梁祖堯《快樂舞台》

舞台劇演員

前往梁祖堯 blog

留言

《小人誌。梁祖堯》Face週刊 103期

網誌分類：傳媒〔訪問+報導〕 |

圖片
網誌日期：2009-05-13 00:59

面對面
小人誌　梁祖堯

第 103 期 Face 週刊

小圈子舞台人，撈過界拍主流電影唱流行歌曲，再憑個人影響力， crossover 流行偶像走進劇場，這等能耐、這些年間，除了詹瑞文，只有梁祖堯。

何韻詩、薛凱琪、謝安琪、林嘉欣 … … 32 歲的梁祖堯，是舞台界的天后宮，吸引流行天后膜拜，爭相同台演出增加自身藝術修為，五月底（ 22 日），代表作之一的《小人國》再度登場，扮完攣歌手「基米高」同假鬼妹「 Rosemary 」，梁祖堯說，這次又有新人物登場，是戴起假大眼走日系美眉路線的「 Angelababy × 傅穎」。

連女神都敢玩，好大膽！

「我唔係撩是鬥非，係唔想放過任何流行元素啫！」

劇目叫《小人國》，梁祖堯說，是因為香港地少人多，梗有一個喺左近，自己也不過是個像《蝙蝠俠》中的小丑一樣，有點人格分裂，所以啱食演員飯的小人物而已。

《小人國 2 》開演在即，梁祖堯扮港女玩大蛇宣傳，自爆好戲在後頭，新玩嘢人物會是影射女神 Angelababy 和傅穎的假大眼㗎妹。

《攣到爆》為梁祖堯贏得第十四屆舞台劇頒獎禮劇帝榮譽，亦讓梁祖堯得到不少明星粉絲，如陳奕迅。

劇場人
1976 年出世的梁祖堯，從小的志願本來是讀生物系，以保護地球和愛護動物為己任。 19 歲，捱義氣幫朋友演出業餘劇團劇目《同性三分親》，自言像鬼上身一樣愛上劇場，報讀演藝學院，從此當上劇場人。

「 King Sir （鍾景輝）係我一個好重要嘅老師。佢有一句說話：『只有小演員，沒有小角色！』每一個小角色，都可以係一個偉大嘅演員。對我嚟講，舞台劇好似傾偈，好似我  家坐喺度同你傾偈，同一段錄音，唔同人聽，對我嘅感受都會唔同。每一晚，嗰一台劇，我淨係為嗰晚台下嘅觀眾而做。我係天蠍座，上升星座雙子座，雙子座又係雙重性格，月亮星座係水瓶座，分析星座嘅朋友話，就好似套戲《神探》咁，我入面住咗幾個人，佢哋以前係有偈傾、共處到，  家變得有磨擦。我係有少少人格分裂㗎，所以咪做到演員囉。」

05 年，梁祖堯憑《攣到爆》獲得第十四屆香港舞台劇最佳男主角（喜 / 鬧劇），亦從文化版跳進娛樂版，拍何韻詩合演《梁祝．下世傳奇》、演出陳奕迅 MV 《 Crying In The Party 》、客串電影《我的最愛》、《絕代雙嬌》和《保持愛你》，劇帝瓣數雖然多，可惜收入卻不成正比，沒劇開的日子，還得靠教戲維持生計：「各行各業嘅人，都係要夠狠夠衰至搵到，等於鍾意寵物嘅人開唔到寵物店一樣。係搵得唔多，但係搵唔搵到食，睇你點食啫。」

就好似套戲《神探》咁，我入面住咗幾個人，佢哋以前係有偈傾、共處到，  家變得有磨擦。我係有少少人格分裂㗎，所以咪做到演員囉。

父與子
05 年做劇帝，上台致謝詞時，梁祖堯眼濕濕說，多謝媽媽和弟弟，自己出道以來的所有演出，這兩個忠實 fans 一個不漏。就算搬出來住，亦選擇同幢唐樓樓下而已，貪日日有得見，梁祖堯和媽媽、弟弟的關係一直親密，最不熟絡的，只有爸爸。

「我細個好孤僻，因為我唔鍾意分享屋企嘅事畀人聽，講咗，人哋都未必明。阿爸同阿媽喺我 7 歲嗰年分開，都係衰啲一般男人嘅嘢，滾囉！但我覺得生物學嚟講，男人係要周圍將 DNA 散開，點解男人一篤精係有幾億精子？一日仲可以放幾篤出嚟？一夫一妻制係幾違反自然定理 … … 不過咁唔代表我原諒我爸爸 … … 佢咁樣對我阿媽，我好憎佢。直到佢臨死，先至叫同佢熟番啲。

「沙士嗰年，爸爸肝癌過身。佢臨死，叫我好好照顧佢另外一頭家個女。嗰一刻我覺得好荒謬，你為佢哋拋棄我，竟然叫我照顧番佢哋？不過我係天蠍座，啲嘢鍾意收收埋埋，一定唔係當面對質嘅人。更何況佢都病到咁 … …

「我記得嗰年年初三係婆婆生日，佢迷迷糊糊好多日，嗰日突然間好精神，明明好多年冇同婆婆聯絡，嗰日又會記得叫我畀 500 蚊婆婆做生日。第二日佢就走咗啦。我諗佢知我哋嗰日要同婆婆做生日，所以點都捱多一日，係一種意志。臨走，佢都叫做咗件好事 … … 」

去年尾與薛凱琪合演《 Last Smile ， First Tear 》，梁祖堯自爆為免在舞台上比出名瘦的 Fiona 肥三倍，要地獄式絕食減肥 20 磅。

導演葉念琛的御用愛將，除了鄧麗欣，還有梁祖堯。年初就在《保持愛你》中，與天后謝安琪做一對。

梁祖堯說媽媽和弟弟是自己的忠實戲迷， 19 歲那年初踏戲台然後報考演藝，也是因為媽媽的關係。

梁祖堯在圈中人緣極佳，閨中密友包括何韻詩和黃偉文。

攣到爆
成名作《攣到爆》，梁祖堯扮盡各種基男，妖冶浮誇的、鬼祟隱藏的，甚至愛在心底口難開的，笑中有淚。可幸的是，現實生活，梁祖堯一早坦誠相對自己的性向，並且有一段同居四年、穩定又快樂的感情生活。

「我 15 歲初戀，其實係同一個女仔，喺佢之前，我完完全全冇呢個 concept （同性戀），唔知呢個世界有男仔鍾意男仔。可能我個人遲熟，人又生得矮，中四前，都係全班最矮，影班相企喺第一行中間揸旗嗰個。到成廿歲，我至發現自己鍾意男仔。當個感覺出現時，我唔抗拒亦唔會特別興奮，由細到大，我願相信任何嘢任何可能性，鍾意 surprise 自己。」

不過，由直變攣，始終是一件大事，要梁祖堯開家庭會議告訴母親：「嗰一刻，見到阿媽傷心，好內疚。其實，唔一定要 come out （出櫃）， come out 唔應該太自私，只為咗自己講咗出嚟舒服啲。如果， come out 只帶嚟傷害、會令到一個家決裂，咁不如唔好講。

「同志條路一定難行啲 … … 幾年前，做《攣到爆》，第一次由文化版跳到娛樂版，我同娛樂記者講，我希望 focus 喺套戲，而唔係我嘅性取向，點知個標題出咗嚟係：『梁祖堯避忌同性生活！』我自己冇所謂，但我覺得會傷害屋企人。
「其實大把人係（基）㗎啦，寧畀你知莫畀你見，或者死口唔認你都奈我唔何，有一個好短嘅時間，我都後悔過認咗自己係。過多幾年後，好慶幸自己 come out 。唔係因為講咗出嚟對自己坦白啲、舒服啲，係心術不正，自己點睇件事最重要。我最終接受到自己，冇人可以扭曲到。」

唔一定要 come out （出櫃）， come out 唔應該太自私，只為咗自己講咗出嚟舒服啲。

上台前咪飲
一開心就想飲酒的梁祖堯，說自己酒喝得太多濕氣過重，所以要去拔罐去濕弄得一背拔罐痕。

「我從來未試過發台瘟，讀緊演藝時，有一次交功課，場戲講飲酒，我心諗做醉酒戲，呢次好啦，又有得趁機飲多啲 … … 點知，飲咗酒根本控制唔到自己。自此知道，上台前咪飲，專業嘅演員係，觀眾畀得錢入場，要對得住佢哋。」

呢一行，唔飲酒照發台瘟嘅人，大把啦！

撰文：朱小博
攝影：林子賢
化妝、髮型： Meegan
形象： Bryan @ the Flaming
服裝： SPY Henry Lau