"Pak" 骨記

琴日放工去咗睇中醫, 為將來作準備
朋友介紹咗一個中醫比我, 呢個醫師除咗把脈, 開中藥
仲會做一種叫 "Pak" 骨嘅治療
據醫師講, 大部份人嘅尾龍骨都係唔正嘅
尾龍骨唔正, 血液循環就唔好, 連帶肝, 腎都虛
我就係咁, 平時條腰骨, 頸同肩仲會好攰好痛
所以諗住去試吓

上到去, 保安好嚴密,  入咗門口
等第一對門關咗, 佢先開第二對門比我入
坐低之後見到隔離個人好熟口面....係.....關芝琳喎  皮膚保養得好好呢
等咗15分鐘左右就到我, 醫師幫我把咗脈, 講咗幾句就入房
要瞓上床"Pak"骨, 好緊張呀, 唔知痛唔痛呢, 我最怕痛架  
而且唔知佢手勢點, "Pak"錯咗死得人架o麻, 好鬼驚
瞓上床之後, 醫師咩都無講就用佢對手隔住條毛巾放喺我條尾龍骨上面
由上至下 "Pak, Pak, Pak, Pak" 四下就攪掂
跟住再 "Pak" 雞翼位同埋其他位置
"Pak" 完做小小按摩就完成啦
嘻嘻, 原來唔係好痛架咋, 小小痛啦

出到去等咗一陣, 有個亞姨就幫我整好一杯中藥
OMG, 一定好苦啦
正當想攞啲山楂餅 & 陳皮梅嘅時候
醫師喝住我叫我唔好用嘢 "餸" 藥
仲叫我唔好按住個鼻o黎飲, 亦唔好一口氣飲哂佢
要慢慢飲, 飲幾啖就休息一陣再飲
唉....咁苦仲要攪啲咁嘅嘢
醫師話要我學吓接受啲中藥
如果我接受佢, 就會好好咁吸收
otherwise, 啲藥知我唔鍾意佢, 所以入咗去會好快返出o黎
唉......唯有係咁啦

醫師覺得我一個月去睇一次都夠, 唔洗睇咁多
每次睇完都會有4包藥比我帶走
仲叫我買咗樽補氣嘅藥粉
每日 lunch 之後沖一大水樽, 放兩匙蜂蜜, shake 完慢慢飲
唔知我有無呢個恆心

"Pak"骨後感想: 琴日感覺上無咩特別唔同, 不過 Vincy 按過我條尾龍骨
佢話以前由上至下咁掃, 會突然有一兩個位啲骨係突出o黎啲嘅
(佢自己都係咁) 但係 "Pak" 完之後就無咗, 成條骨都好順好平
(其實大家都可以自己掃吓, 睇吓有無突出o黎)
今日感覺明顯啲, 馬場嘗試大力咁按我頸, 肩同腰骨嘅位置都無再痛
以前佢幫我按摩或者出去按, 就算細細力已經好鬼痛, 叫到拆天咁
今日竟然無喎, 呢方面真係好 work  好爽呀

無論如何, 為咗將來, 我要好好調理身體呢