大大大考

嘩~對上一次寫BLOG原來已經係一個月多既事...

其實係因為10月15日個日考實習試, 自己考會考時都冇咁緊張..

特別係考試前3日更加冇胃口(加上實習成日走動~) 感覺自己減左磅

 評審一共有3人: 一個係部門內既護士K,一個係部門主管B(係高級護士之上), 一個係出面其他地方工作既高級護士V.

當日原本係預左早上8點考. 不過個部門主管B話咩太早唔得要改8點30分..其實係佢自己懶..呢D高級人士日日唔過9點都唔見人個種..所以其實8點30分都好為難佢云云..汗.

打左電話比學校改時間.

點知當日8點時見有人拍門(因為係精神病院好多門都上左鎖的,只有護士先有鎖匙), 我開門一見...8點而已..仲咩咁快到左..

不過高級護士V都好好人, 招待左佢休息室飲杯咖啡

一傾之下原來係學校冇通知高級護士V...不過點都好,都要等齊三個評審先開始得...(當時只差部門主管B一個...)

我於是返回工作位置, 當日我係有三個病人In charge, 評審會選一個. 做咩要睇個試係幾點鐘.

好似我呢D咁早既.. 99%都係負責梳洗清潔既工作..如果係下午, 會係一D活動, 好似烹飪教室之餘~

我既3個生病人, 身份同背景都好唔同.. 一個女士係好情緒波動, 另一係女士係因為腦腫瘤手術完左之後傻左... 而第三位既先生係因為破碎家庭冇人教, 犯左兩次強姦, 第二次時仲殺左女事主... 係精神病院前坐過幾年監.

(其實自己都好驚..有D咁既病人)

不過我做左4星期, 呢位先生都係好好人, 佢只會講簡單既野..(好多時都只係單字), 都好平和,又幾好禮貌, 可能係因為呢幾年黎一直有精神病藥物控制, 同埋都住左响度好幾年..

反而係有另一D男病人同我地開玩笑太過火..係佢保護我地.. (暴力出於好心..不過都係用錯方法)

當日佢知我考試, 我同佢話我好驚, 佢同我話: 唔洗怕既, 冇問題!

(我打左個突, 第一次佢同我講一句野!!)

好好彩. 評審都係選左呢位先生: 佢係三個最易既一個..

可能評審們都係好心.. 唔想我考太難既試吧..

一直我都好怕既部門主管B (之前我比佢無理地話左兩次) 唔知仲咩當日鬼咁好人..(可能係因為知道係因為自己衰改時間, 人地又早左黎..我又好識做地招待好人地..始終佢都有面D) 笑到4萬咁口...

我考完都覺得考得唔錯...覺得冇咩野可以令我肥佬.

因為係專業資格試. 分數唔可以立即知.

不過同事們都偷偷話我知: 部門主管B話係非常好.. 所以都會考到~!

聽到後好開心~不過都係唔太安樂. 我要知道分數先可以安心.

過左幾日既星期一, 返學公佈左成績: 25 / 30 只有好評, 冇負面的.

老師話 : 冇負面既評語... 我覺得你應該得多過25分!

我話唔緊要~點都係PASS左~!! 即係...

我可以成為正式既護士了~!!