我們這一家　　　 ( Jan 19, 2008 )

星期六唔洗返工，等埋小月收工後同佢預早慶祝佢生日，第一個節目就係唱k，唱到大約四點幾，接住第二個節目，就係睇戲，之前小月話想睇「我們這一家」，既然佢鐘意，早一日已經買定飛。

呢套真係唔錯，幾好笑，而且用返無線班配音員，所以特別好笑，尤其花師奶嘅飲歌「別怪她、別怪她」。雖然係好笑，但最後都有感動位，我覺得好適合父母帶埋d小朋友去睇。

我們這一家，花師奶同阿柑轉換咗身體↓

我最鐘意圖中間果個白鴿人，佢一出場，我就笑爆嘴，呵呵↓

睇完戲，我地就喺apm行街，然後就去和民食晚餐，食完之後再陪佢去買衫，之後帶佢去一個神秘地方。 (其實都唔係有咩咁神秘，因為喺唱k時已經同小月講咗‥‥‥)

登登登登‥‥個神秘地方就係我屋企，原因就係小弟喺前一晚喺屋企整咗個tiramisu，今次係我自出娘胎整嘅第一個蛋糕，雖然我係好鐘意煮嘢食，但對整蛋糕就一般興趣，原因係整一個蛋糕太煩了，又要好準確嘅份量，又大工程，所以都係煮嘢食容易d。

但今次整，當然係因為小月生日，所以想整俾佢食，不過整呢個蛋糕都幾經波折，可能係第一次整，冇經驗，去買個6吋嘅甩底蛋糕盆，但就買錯咗一個冇得甩底=.=，然後想溶魚膠粉，但唔知點解溶極都溶唔到，可能我用咗小微波爐盒隔水溶，可能保溫，所以溶唔到，不過我有咗經驗，下次會成功的。

當晚我妹、朗少、我妹夫個細佬，同埋我細佬都上哂我屋企，真係好熱鬧，佢地上嚟當然唔少得開檯喇，我都好耐冇打了，最後我、我細佬、我妹夫(我妹夫收工大約12點左右上咗嚟)都輸俾我妹夫個細佬，不過有佢地兩兄弟喺度真係好熱鬧。

我地打到一半，就係時候食蛋糕喇，朗少見到有蛋糕當然開心到又想吹蠟燭，唱完生日歌後，由我分蛋糕俾大家，我真係想聽下大家意見。食咗之後，大家意見都話唔錯，好味道，而我自己食，都覺得同出面人地整嘅一樣，我真係好滿足，不過有缺點就係我落得太多可可粉上面，搞到好多人食果陣，吸咗d可可粉入喉嚨。可能味道唔錯，我媽叫我快d再整，因為佢都好鐘意食。

當晚我第一個「處女tiramisu」，知道小月鐘意熊仔，所以加上熊仔裝飾↓

小月&蛋糕，咦﹖點降隻熊仔個頭同個心會啡咗﹖因為佢企唔穩，成塊面撻落可可粉上面↓

一齊唱生日歌，但朗少對眼一直望住支蠟燭，想第一時間去吹熄↓