有Danny為伴的歲月

有時真係覺得幾無癮，一個人係到自話自說，究竟有幾多人認同我呢？點解到訪又唔出句聲呢？係咪覺得我幾十歲人好無聊，又或者好膚淺幼稚？要講認真、要講情深、要講細心、要講忠心、要講資歷，我都比不上某些歌迷，可能有人會對我的癡人癡語嗤之以鼻。所以，漸漸都唔係幾想再寫落去，但係又好唔捨得Danny，好似辜負咗佢咁（唔好又俾人噓呀）。

好似今日咁，假期又例必陪阿媽打牌，又要輸啦。播咗好耐歌啦，都唔係Danny d 歌，最後終於頂唔順，話：‘唔得，我要搵Danny！ ’  真係又好靈驗，果鋪牌我即刻食出，重係雙辣添，我當然又要大叫：‘哈哈哈……多謝Danny！’上次有blogger問我那時唱邊首歌，我當時都無留意，所以錯過了。今次，我專心地記住了，係一鋪牌內唱咗兩首歌，開始時係親愛的你，食糊時係只因愛你。不過之後都無糊食，悶死呀，於是我又口多多話：‘Danny呀，救命呀……’ 點知即刻又食糊，果時係唱緊揮不去的你。雖然最終都係輸收場，但係我都係好開心。

重有，最好笑係，打牌期間，我又左搞右搞個mp3 播放機，終於跌咗佢落地下。阿媽即係話：‘唉唷，跌咗阿陳百強落地添……’   阿媽，你係咪咁風趣？定係幽我一默先！ 

點都好啦，多謝你呀Danny，我地就憑歌寄意啦，一切在心中。
就像你要給我打個招呼：親愛的 朋友
我想念你:  只因愛你
我不停的記掛着你：皆因  揮不去的你 常在心中

期間，阿媽又提（其實，每次聽Danny的歌，都一定講嘅）： 真係好可惜呀……
於是，我就同佢講（亦都希望對所有仍時覺得傷感、放不低的歌迷講）：‘有一句好啱嘅說話，係咁講嘅：當有人仍記起、想念那人時，那個人就永遠存在！’  阿媽聽完即時放鬆咗。我要封這句為智理明言，希望可舒解每個傷心人的心結。

Danny, 你是永遠存在我們的深心處，不會磨滅的！