Friends有囍事之~~慧儀與老Ray上集

呵呵~~各位香港o既市民,大家好~~

我兩場婚禮Show都完成了.第一場留返下次講.今次主角係慧儀同老Ray(Raymond).

我諗大家都應該明白,唔係我有兩個friend分別結婚,而係慧儀同老Ray己經成為合法o既香港夫婦了,可喜可賀.

其實,Raymond係經過慧儀先至識o既,因為老Ray係慧儀o既男朋友,尤如呀媽係女人一樣.有一個情況想講,就係唔知大家有冇試過同朋友的伴侶唔o岩傾,夾唔埋?雖然我係好平易近人,但係,有時有d朋友的伴侶真係好不知所謂.真係會頂佢唔順......

不過老Ray唔同,真係一條好仔(我係有品人,只會同有品人為伍,呵呵呵~~),又好玩,我地好快熟落.仲一齊打PSP屠龍.所以,今次係好朋友同好朋友結婚,真係超開心,最緊要係我的摰友~慧儀嫁得好呀嘛.係唔係先.

有睇開我呢個爛鬼Blog o既市民,都知道慧儀亦都係我o既音樂拍檔,好自然,佢結婚緊係搵我幫手搞音樂啦!!坦白講小弟未正式幫人搞過婚禮show.初初慧儀搵我我都唔係咁清楚應該點做.不過好彩今次有Wedding Project Manager~老俊幫手.又有身經百戰o既拍檔~仙地幫手彈琴唱歌,唱得又作得又可愛o既歌手~Carol,新相識,有創意o既型男歌手~Sameul.所以,今次場婚禮show好順利呢.

今次婚禮準備o左幾首歌,全部都係我地親手做,其中一首更加係神秘得來又刺激人地淚線的歌,Carol同仙地送比呢對新人的力作~不變.暫時只得live版本,遲d會有正式版本比廣大o既香港市民欣賞.

跟住我要講下當日行程,可能會悶親各位香港o既市民,但對於我真係好值得回味.

慧儀結婚正是本月19號當日,依家先來寫blog是關我太攰喇....抖足成日...

呢幾日其實我都係Band房過夜,19號o個日由十二點幾訓到四點就起o左身.訓唔返...試下上網同打陣機睇下訓唔訓得返,結果都係冇睡意,谷鬼氣不如唔訓,準備定婚禮show D野,試下個新Mixer點用.又練下琴.搞到9點鐘左右就去o左樓下啪個早餐,原本想飲早茶不過呢排飲太多...所以係咁易食個牛扒煎雙蛋加塊雞扒就算數......

食完之後就去o左附近買d野,工廠區其實買o野都幾方便不過只限日間,一入夜就自然百冇...跟住又上返band房Hea o左一陣.就走去"非法",原本想搵慧儀個細佬幫我飛髮但一直都冇時間約佢.結果都係屋企附近搞掂佢算,成場婚禮冇人出聲話我個髮型核突我諗間野都算飛得唔錯掛.....

慧儀話我經常以一身電車男(雖然佢冇咁形容過我)o既打扮實在要改一改先好出席佢o既婚禮,但係小弟有苦衷因為我實在太靚仔,唯恐引起天下大亂所以我唔可以打扮得咁型,希望廣大o既香港市民体諒....

剪完個爛鬼頭之後就返o左屋企洗白白同換件老西.原本真係想成套老西咁著,但係好耐冇著過條西褲,著唔到,原因呢排小弟好食好住~朝朝飲早茶,晚晚住band房o既關係,腰圍有某程度上同年輕時有所差別....結果都係著老牛算喇,跟住撻o左我細佬件西裝嬲.整件樽領.跟住就搭車返觀塘去會瘋過數買花花公主準備新出o既書.係度恭喜一下小花花新書大賣.

跟住約o左老俊係band房附近間餐廳食d 野,係度忍唔住大叫真係好鬼難食....結果頂唔順食o左一半就上band執定d野起程去酒家喇.

老Ray其實一早係我非緊法o既時候就已經打電話比我約時間幫我車o野過去酒樓,不過我d架生都幾多:一部數碼琴已經夠重,再加部新琴Tyros 2,呢部野先至係最重...再加兩個琴架,一個bass pedal,一支咪架,一個譜架,一箱雜物咁,得我同老俊拎唔晒.結果三點幾老Ray同帶同幾個兄弟加部七人車前來救援.辛苦晒咁多位,不過都搬餐死.慧儀都係車度,個頭同妝都一早set好o左但著住便服個look真係好鬼搞笑,不過係正常o既唔通著住件婚紗咸街走咩大佬!?不過佢個頭插住d假o既花花草草真係好鬼想撻左佢來研究,又或者如果我手上有水的話會想倒d落佢個頭度......

打到呢度有d眼訓....

所以我決定出下集...早抖....