琴日超開心~~

琴日朝一早起身,嘆個早茶,幾咁寫意,跟住去APM聽下ROM玩音樂,嘆杯朱古力凍飲,真係一流~

跟住仲有時間喎,就去Band房練練琴,真係生疏o左好多,首黑夜不再來真係要Keep住日日練先彈得順...由今日起要盡量抽多d時間上band房練習.

係band房勤練一輪武功之後,諗住早d過旺角行一陣,不過落到樓下撞到H仔,走返上去佢band房到吹一陣水.H仔隊band就快出碟喇.遲d可能會有機會幫佢地彈o野.正~

好喇~跟住約o左慧儀,老俊同仙地佢地去朗豪坊食飯,食鐵板牛排,好鬼好食~~要多謝晒佢地呀~同我補做生日請我食飯~最重要都係同一班好朋友聚聚~

食完飯跟住上OZONE12樓聽ROM表演,係呢個月last一場呢,希望佢地快d再係朗豪玩show.佢地今次有玩獅子山下,玩得好好,咁我又比大家睇下我彈到甩晒o既版本比大家笑下:

大家留意下我中段彈甩o左之後,我身邊兩男士o既反應.

睇到一半,肥強都來到喇.肥強佢遲收工同唔到我地咬米真係可惜,鐵板牛排好好食你走寶喇,你自己搵日試下啦.仲有達達同呀基唔得閒來,真係美中不足...

開開心心睇完show,我同老俊座肥強車返Band房,本來走o左o既慧儀又Join埋一份,跟住又Call埋係樓上夾緊band o既H仔來,我地以前讀柴灣TC o既表演隊終於有機會聚埋一齊喇,梗係要影張相留念下(手機影o既質素麻麻)~~

老俊,H仔,肥強,我,慧儀

男人老九o既我,睇到呢張相唔多唔少都有d眼濕濕,大家讀書o個陣開開心心夾band,真係好快樂架~~跟住畢業,大家都要各奔前程,差唔多成七年八年喇,好難得有個咁o既機會大家聚一聚呢~~嗚~~

嘻嘻~雖然H仔唔得閒,去返佢自己band房練習,不過我地四個都繼續Jam下歌玩下~~好開心,好耐冇聽老俊唱歌,一於出山吧,返正你都買o左支新結他喇~

不過老俊第二朝要返工,唔可以玩得夜喇.大家都要散水,留待下次再一齊玩音樂,不過我留係band房練到依家先至返來屋企,臨訓前寫個blog同各位香港o既市民分享下~~好喇,晚安各位.