人生無常

先父係果隻傳統麻甩佬，即係自認咩都識咩都會咩都叻果種。
就係因為咁，身體有唔妥就自認醫生，自己醫自己。
加上家母以前响診所做配藥，知道一啲簡單同大路o既藥，傷風感冒咳黎黎去去
都係果啲消炎止痛收鼻水藥咖啦，所以老豆一話有咩唔妥，就叫家母去配藥，
咩鬼野事都一定配消炎藥…
自己醫自己個後果係懶叻以為自己係糖尿病拼發症，到迫佢到醫院先發現係
癌症晚期。
由確診到過身，前後三個月。

大嫂個媽媽剛剛相反，有咩唔舒服第一時間去睇醫生，飲食健康，有份輕鬆工，
閒時打下麻雀陪老公行下街。
星期一响屋企突然覺得下腹痛，世伯打電話送入醫院。
屋企人以為佢感冒菌入腸，開始時都好輕鬆。
我到星期二先有時間打電話比佢諗住問候句，點知大嫂拎起電話已經喊緊，
醫生話伯母已經腎衰竭…
禽晚世伯決定拔喉，佢地一家睇住顯示心跳部機好快由輕微跳動至一條直線…
由入醫院到過身，四日。

禽晚我一路問一個問題 - 點解?
先父個情況我一路認為係佢自己攞黎，但伯母呢?