魚腩肉碎粥

魚腩肉碎粥

前言：

之前自己煮過一個魚片粥，味道好正，不過缺點就係有d小魚骨，唔小心的話都幾危險，我媽話不如用鯇魚腩，頭上突然有盞燈"叮"咗一聲，一於今次試下。

行下街市，見到有脆肉鯇，諗諗下不如貴d就貴d，買嚟食下，因為我好鐘意食脆肉鯇，好爽口，而且用嚟煲粥，唔怕煲到d魚爛哂，一於用脆肉鯇。

材料：

脆肉鯇魚腩、免治豬肉、芫茜、米

做法：

1.  先洗米煲粥，之前我都講過，我鐘意食d米爆開哂嘅粥，因為會綿d，所以我會落多d水去煲，我上網睇過煲粥有d技巧，就係要煲滾水先好落米，同埋加少少油(如果煲淨白粥就唔好落油了)，咁d粥就冇咁易"痴"底，同埋d粥會滑d

2.  然後用生抽、粟粉、雞粉、麻油、胡椒粉醃一下

3.  脆肉鯇魚腩可以叫魚販幫你切埋一件件，返嚟洗乾淨，用少少鹽同雞粉，同埋胡椒粉醃一下

4.  米煲滾成粥後，加入免治豬肉，然後一邊攪拌一邊壓爛

5.  煲多三分鐘左右，再加入脆肉鯇魚腩，再煲大約五分鐘，加鹽，撒上芫茜，上碗完成

後記：

今次魚嘅味道反而唔及上一次用魚片，唔知關唔關今次魚肉比較硬身，所以煲唔出d味道，但都唔錯，而且脆肉鯇真係好正，用魚腩煲粥都只係條大骨，唔怕有小骨咁危險。