苗圃挑戰12小時 2009

今年第二次參加, 上年跑7小時16分, 我左度右度, 左計右計, 今年操山仲多過跑步, 估計7個鐘應該可以做得到既

人算不如天算, 今年已經係11月初舉行, 天氣理應清涼很多, 但係呢, 陽光普照, 曬到阿媽都唔認得, 最慘係我發覺已經唔可以用跑去追回我上山落斜既時間, 跑步已經比以前退步咗好多!

最抵死都係抽筋!呢樣野我真係意料不及!

最後做出時間係7小時12分, 比上年快4分鐘!

練咗咁多次山, 最後只係快過幾分鐘, 好似唔係好抵!

多謝joewong 提供照片

賽後檢討:

第一節：油塘三家村遊樂場 至 井欄樹

一起步時照樣衝出去, 見到跑班幾個同學, 係佢地後面死跟, 真係唔知死字點寫, 去到晨運徑陽光實在太猛烈, 開始有力不從心既感覺,去到澳景路見到細良, 馬王, 跑班既同學打完個招呼繼續上路, 啲快人都走得7788, 所以唔係太塞人, 去到發射站附近又見到  wahwah 同阿hoi, 我忍唔住問佢地有無傘呀, 好鬼曬, 落到百獸園見到勁人明哥, 跟住佢跑, 去到 井欄樹發覺佢已經快到無咗影, 唯有獨自上路

此段用咗:1 小時 11 分 56

第二節：井欄樹 至 沙田坳

由井欄樹去到大藍湖 呢段路仍然表現咗我既弱點, 無咩改善過, 凡有人係我後面我都俾佢地過先,全程終之要安全至 上, 但係感覺到啲腳指成日想抽根, 去到Dongyang shan, 無咩人係前面, 中途要抖幾次, 唔可以 一野上到頂, 有啲失落, 呢個時候大脾都未見有咩問題, 去到飛鵝山都未去到1/3, 大脾近波羅蓋有企圖抽根咁, 我立即坐係路邊, 點知一坐即抽, 我面上既痛苦表情實在 無辦法再掩飾, 好彩有個後生仔俾咗啲油我搽, 又有跑班同學來慰問, 又有人問我要唔要鹽, 好彩搽完油好似好番啲, 但見到啲人開始衝落山,意志無哂, 都唔知可唔可以繼續余下既路程, 欲哭無淚

此段用咗:1小時 40分23秒       1+2 = 2小時 52 分20

 

第三節：沙田坳 至 大埔公路(九龍水塘)

去到獅子亭, 繼續上路, 但係已經無哂心機, 竟然落樓梯時慢慢行唔跑落去, 心理質素差到無 人有, 兩邊腳指又開始起水泡, 隻右腳大脾後面既肌肉又開始忍忍作痛, 兩隻腳好似發緊炎咁, 落到引水道, 無啦啦有人叫我, 原來係勁人中哥, 唯有跟住中哥, 但係佢行得好快, jog 住走, 又停下, 先可以見到佢既背影, 呢段蝕咗好多時間, 好想死

此段用咗:1小時 26分04秒       1+2+3 = 4 小時 18分24

 

 

第四節：大埔公路(九龍水塘) 至 城門水塘主壩

上金山段反而好好多, 起碼上山唔會辛苦, 腳無痛, 前面有幾個女仔, 搵佢地做目標, 點知係咁跟住佢地無留意, 行錯路, 無右轉上樓梯, 好彩都唔係蝕好多, 出到去上孖指徑中段, 見唔多對路, 要跑下先得, 希望可以用一個鐘完成呢一段, 跑跑下終於見到中哥, 佢讓我跑先, 見人就介唔理咁多, 去到城門水塘喇喇聲去幫襯下先

 此段用咗:1小時 01分15秒       1+2+3+4 = 5 小時 19分

 

第五節：城門水塘主壩 至 鉛礦坳

去幫襯完唔敢逗留太耐, 一開始慢慢jog , 點知有個女仔係後面跟住, 我俾佢地先過, 又跑下, 又行下, 終於又追到佢地, 我決定一野咁介咗佢地先, 睇住啲座標做target, 一路數74, 75,76, 終於到77喇, 咁就差唔多跑完, 真係有工作人員係個出口蓋印, 去到個3k 既大斜路, 唯有望住個地下急步行,前面100米有幾個男仔, 就搵佢地做目標, 去到鉛礦坳check point,終於可以追到佢地喇

此段用咗:1小時 21分05秒       1+2+3+4+5 = 6 小時 40分

 第六節：鉛礦坳至大埔終點

上年仲可以係個 check point 坐下食下梨, 今次係咁意啦下根, 食咗隻蕉上路喇, 中途行行下左腳大脾又想再抽過,唯有同自己講放鬆啲, 去到行車路剛好20分鐘, 一路跑時見到似面有幾件, 又搵佢地做目標, 介咗幾件, 但係跑得比上年無咁好力, 同前面個女仔差8秒, 賣吉!

此段用咗:31分50秒       1+2+3+4+5+6 = 7 小時 12分