《啤酒紋身》+《螢光金魚》

我阿爺份人好古怪，唔鍾意守規則，同我一齊玩得好開心好癲，佢經常帶我去湖邊電魚，一支電棒伸入去啲石罅，按下個制，咁就有魚電暈，慢慢浮上水面，次次都睇到我瓜瓜叫。有時佢仲會攞我啲功課嚟做，話睇下自己識唔識，咁我又可以慳番唔駛做。

我十歲嗰年佢死咗，好似係因為飲酒過量，令到個肝有事，佢死嗰晚不斷咁嘔，之後送咗去醫院，就永遠都無再返嚟！

我無諗過會有一個親人離我而去，而且永遠都唔可以再見。阿爺留低嘅物件，佢所做過嘅事，都印喺我心中。我十六歲嗰年，決定去紋身，我想紀念阿爺，我想再次拉近我同阿爺嘅距離，我想藉着紋身時嘅痛楚去懷緬一下阿爺死嘅時候，我嗰種心痛嘅感覺！

佢係一個好人，一個影響我好深嘅人，佢教識我飲酒，佢教識我做人要有原則，教識我點樣找尋快樂，教識我牙齒當金駛，講過就要實行！

我紋咗一個我自己設計嘅圖案喺左邊腰背，係一條魚喺啤酒中暢泳，紋身嘅過程，我亦如願以嘗，享受一針又一針痛苦中嘅悼念，神聖而莊嚴，美麗而永恆！

阿爺，我與你同在，愛你！

文：Jackal

（八）螢光金魚

Jackal其中一樣最吸引我，就係滿身嘅紋身，我成日覺得男人有紋身真係型好多，想像一下佢哋喺紋身過程，俾支針「逐下逐下」拮落去，不發一言，靜靜咁享受呢種痛楚，諗起都勁，諗起都型。

有次我趁Jackal瞓咗覺，靜靜咁欣賞佢既紋身，發現佢腰背有杯啤酒，裡面有條魚游來游去，好鬼得意。但係我越睇越唔妥，得一條魚游，咪好寂寞囉？所以我攞起一支墨水筆，喺條魚側邊畫多一條上去，仲用我支好靚的螢光筆，油埋顏色。

我喺度欣賞緊自己嘅傑作，Jackal一個反身就醒咗，佢問我做咩咪咪咀對著佢笑，我梗係叫佢欣賞自己杯啤酒入面多咗條魚。

我等緊佢讚我畫畫有天份，點知佢突然一手叉住我喉嚨，大聲喝問我點解搞佢個紋身，再一腳撐咗我落床，好彩我識打個筋斗，無損無傷。我從來未見過佢咁憤怒，佢同我講，呢個紋身，神聖不可侵犯，跟著佢仲喊起上來。

我最唔開心，就係見到佢唔開心。

我知我又做錯嘢，即刻攬住佢係咁鍚，大聲話：我以後唔敢喇！

我心諗，佢可能唔鍾意條魚嘅顏色。