市場先生 - 市淡‧心淡

今天看了市場先生一篇新文章，寫得非常好。

留為紀念先。

※※※※※※※※※※※

市場先生 ─ 市淡‧心淡

今日筆者放一日假, 昨天以為今日會繼續落雨, 所以無計劃特別做d乜. 結果, 中午無落雨, 又無太陽晒, 感覺幾好. 趁今日放假, 筆者當然要陪女友飲中午茶, 順便去證券行將前一排買入的2888渣打集團, 以及加碼買入的2628國壽和3328交行提貨轉名. 去到股票行, 嘩, 水靜河飛, 幾乎見唔到有乜散戶坐係度, 連電話聲都無乜聽到. 睇來大市每況愈下, 持續的疲弱表現, 已經令到散戶的熱情冷卻, 甚至心灰意冷. 現時個市況用"熊市"去形容唔夠貼切, 現時係"淡市", 心態冷淡, 筆者有些朋友現時已經對股票失去興趣, 對手上的持股不聞不問. 未敢去問(收市價), 不堪回首(3萬2). 所謂久病床前無孝子, 股市就像久病之人, 散戶就像床前的孝子, 股價急速的下跌, 未必會打擊到熱情與鬥志, 仍然可以高呼好公司有買貴, 無買錯, 長線投資. 不過, 如果股市一年, 兩年都久沉不起, 散戶就有可能會死心, 最後, 再來一段持續的大跌, 就好似年初二晚煙火匯演的最後5分鐘, 持續不斷向上發炮, 頭上的煙花前仆後繼的展開, 七彩繽紛, 爆炸聲震到耳仔差不多撞聾, 口裡卻不期然地發出陣陣嘩嘩聲. 咁散戶就會由"死心"變"嘔心", 想起股票都想作嘔, 發惡夢, 要不計價沽至一股不留, 才得到完全的解脫, 咁就差唔多係另一個牛市誕生的時候了.

之後見到余若微在天橋上派宣傳單張, 路人反應唔算積極, 伸手問佢拿宣傳單張的路人唔多. 記得幾年前筆者曾經在位於置地廣場43樓的香港銀行家會所食午餐, 當時係筆者首次見到余大狀, 佢俾我的感覺, 係好溫文優雅, 好有修養. 今次筆者走近余大狀接左佢的宣傳單張, 然後同佢講支持的說話, 余大狀好有禮貌, 面帶笑容地講多謝. 余若微係資深大律師(Senior Counsel), 競選名單排第2位的陳淑莊係大律師(Barrister), 競選名單排第3位係一位CPA. 在香港，律師分為事務律師(Solicitor), 和訟務律師或大律師（Barrister）. 大律師一般必須以個人身份行業，承擔無限責任的風險，而不能隸屬於任何合伙律師事務所或者公司。根據维基百科的資料, 大律師在累積十年經驗後有機會被香港終審法院首席法官委任成為資深大律師（Senior Counsel），而所有在主權移交前已獲認許為御用大律師(Queen's Counsel)的香港大律師，在香港主權移交後全部自動獲得香港資深大律師的資格。截至2007年3月香港資深大律師共只有78人, (71男、7女）。

之後, 筆者繼續減肥大計, 去左某會所的健身室做跑步機. 跑左一個左右, 沖完涼, 就舒舒服服在會所睇一陣報紙和雜誌. 睇到壹周刊有篇講到資金乾塘,樓市向下. 筆者認為股市不振樓市也唔會好得去邊, 筆者唔認為股市和樓市可以decoupling. 所以如果有人睇淡股市, 卻走去買樓, 以為股市唔掂而樓市可以獨善其身, 筆者就不敢苟同. 有人話去酒店問, 知道今年多人結婚, 所以樓市會掂. 筆者就認為, 其實年年都有唔少人結婚, 樓市卻有升有跌. 多人結婚只可以話有住屋需要, 但住屋唔等於要買屋. 況且樓市如果靠用家, 唔慌升得起, 你去有新樓盤銷售的地方問下d買家, 買得最豪氣最多個d, 有幾多個係等緊個新單位要自住. 再講到租金上升可以帶動樓價上升, 筆者也唔認同. 筆者覺得租金係由樓價帶動而非前者帶動後者. 需知道持貨(指物業)係需要成本, 因為沒有資金係免費的. 即使full payment唔使供, 仍然有機會成本, 你唔買樓的錢拿去買無風險的國債都有幾厘息收. 如果要供接揭更加唔使講. 當樓市好景, 樓價上升, 業主預期3個月樓價可以升十幾二十percent, 當然對出租一年才得到4,5厘的租金回報無興趣, 甚至有業主等到租約期滿收樓放賣盤. 於是租盤買少見少, 自然隨樓價上升. 但一旦樓市逆轉, 牛皮一段時間, 甚至樓價下跌, 唔少業主就會放租幫補持貨成本. 所以樓價下跌, 租金一樣會被帶動下跌. 筆者認為d人願唔願意買樓, 主要唔係睇供求(市場上可以出售的單位永遠會多過需求), 唔係睇新樓動工量(市場上未賣的一手樓加上待賣的2手樓永遠會多過需求), 唔係睇租金(樓價跌, 租金一樣會跌, 所以租金唔會成為樓價的支持), 唔係睇利率(幾高的利率都有人願意買, 相反, 幾低的利率一樣可以無乜人願意買樓), 其實買唔買樓, 主要係一個信心的問題. 無信心, 有錢都唔敢唔願意買, 有信心, 借錢都仆倒去買.

總結一句, 租金係供求的問題, 樓價卻是信心的問題. 即係話, 供求決定租金, 信心主宰樓價.

※※※※※※※※※※※

順帶一提：

我從不相信甚麼「供樓/租金支出佔收入百分之XX屬於合理 (or 健康) 水平」，或是乜鬼理財顧問同你講「只須保留 X 個月的家庭開支作備用資金」這些理論。這是很簡單的道理：每個人對金錢的觀念、風險的接受程度都受著多方面因素影響，如個人/家庭處境、人生計劃、外在經濟環境等等，不會有一套 generic 理論可供環球通行。而事實上，我們不時聽到的「你就好啦」，「佢呢舖發喇」，就是我們年復年日復日實踐這個理論的驗證，那些「你」、「佢」不能由「我」取代，當然是「我」的問題 (或選擇)。

例如，以部份人的標準來看，我屬於疑似有能力月付萬餘元租金兼且是好租客的一群。

從業主角度出發，收入穩定的大公司公營機構職員自不然是最佳租客：收入有保障，自然交租都有保障。

作為一個租客，尤其是所謂月入穩定的打工仔，由於收入實在穩定，工資上調的幅度往往不會太大，而且通常都追不上市值租金以至通脹的升幅。即是說，今日你決定了用這個比例的工資來付租金，如日後租金上升，由於加薪幅度通常都追不上這個升幅，那租金佔工資的百分比便嘿嘿，有排你受。再看工資的面值，雖然數字上是增加了，但在物價上脹的情況下，購買力能否追得上則成疑。儘管這裡有太多假設，亦欠缺數據支持，但我覺得做一個對現金流有長久影響的決定前，想多一點想壞一點是需要的。不要聽了人家說這個百分比 OK，便飄飄然的相信自己真的負擔得來。或者確是擔得起，不過卻有可能大大影響了儲蓄計劃 (即累積財富的速度以至日後的生活質素)，對家人的承擔 (家用呀喂)。接受與否，當然就是看這個「我」如何計數。

所以，雖然我疑似，但我唔會，卻不代表人地唔會，就係咁解。