Ignite The Hope <Stab Me Alive> MV 拍攝花絮

好！等我嚟報告下Ignite the Hope MV拍攝當日嘅狀況啦！當日我十點半去到ITH Band房幫手搬AMP搬鼓(喺呢度真係要多謝ITH同佢哋朋友借出嘅音響器材！)，大概十一點半就到達咗我哋嘅拍攝地點--荃灣一座工業大廈嘅其中一個單位，拍攝隊伍已經到咗場set緊野，set好之後就開始拍攝啦！攝影師唔係用平時見慣嘅大攝影機嚟拍，而係用一部單鏡反光相機，我呢啲問題寶寶就當然立即發問啦，原來嗰部係一部可以拍高清影片嘅單鏡反光相機，拍出嚟嘅顏色仲好靚添！

基本上全日都用嚟拍ITH夾Band嘅shot，但你唔好以為好舒服呀，因為ITH唔係扮彈結他打鼓，而係插哂電真彈真夾o架！我見住佢哋由十一點幾開始玩Stab Me Alive玩到晚上九點幾(中間當然有食飯時間啦！)，體力消耗都唔少！尤其是Nicky，我真係見佢每一個 take都出盡力打o架！所以其實係好攰o架！(事後Nicky講笑咁話以後憎咗Stab Me Alive呢首歌，哈哈)

拍到九點幾終於拍哂夾Band嘅shot，輪到拍女主角嘅戲份，女主角係主音Henry嘅朋友，係一位好高好瘦嘅靚女，佢大概六點幾就到咗，等到九點幾先到佢拍，真係好多謝佢嘅體諒呀！

拍到十二點終於拍哂啲AMP嘅「戲份」，係時候要搬返去ITH Band房同還返比佢嘅朋友，本來想call兩架van仔，但咁夜又真係無乜人接call，結果搵咗幾間先搵到司機幫我哋運貨，不過佢得一架車，所以要來回運兩轉，結果搬到凌晨兩點先搬哂，仲要落大雨添，真係又夜又凍呀...

搬完因為第二日要返工，所以就無折返拍攝場地跟進MV narrative嘅拍攝(而家諗返起覺得自己超衰...T_T)，但聽佢哋講拍到四點先拍完！喺呢度真係要二萬個感激男女主角同拍攝隊伍，尤其是拍攝隊伍由早上十點開工做到凌晨四點，仲未計搬器材走喎！成十九個鐘呀陰公！呢次真係要喺度跪謝佢哋！

聽朝日出時間(你無睇錯！係日出！！！)我哋會去一個天台拍埋餘下嘅戲，至於點解要去天台拍同拍啲乜野，就等你哋估下啦！到我哋場show As One當日嘅MV首播就會開估o架啦！聽朝影完相再post上嚟比大家睇啦！

包 @ RM

想睇各隊band的MV，記得19號黎到蒲吧參與Rock Motel第二場「AS ONE」

到時將首播

想了解更多Rock Motel 同想留意Rock Motel進展

除yahoo blog 仲有facebook

www.facebook.com/RockMotel