岡田咖啡店十奧比斯盲俠行2009

星期六21/11係一個大日子,一年一度嘅盲俠行就响呢日舉行,事前我先同同事去岡田嘆番杯咖啡先

一放工我哋兩條友就搭地鐵去咗尖沙咀,去到位於Wood House嘅岡田咖啡

今次同事叫咗個抺茶蛋糕,我都試咗兩啖,同士多啤梨味一樣咁好食,而同事就話抺茶好味啲

吉列黑豚肉三文治,兩個人食都得

由於用電話影相影出嚟嘅效果係差咗啲,睇唔清塊豬添!!

同事嘅巴西朱古力咖啡,各人隻杯都唔同,但都係細細隻,細到唔曉話咁細

後加嘅朱古力粉,加完都係無乜朱古力味,咖啡蓋過晒一切

我都係叫朱古力巴西咖啡

menu上其實仲有盧旺達等好多其他唔同地方命名嘅咖啡,而我哋已經揀隻最平

各人一杯後都仲可以添飲多少少少少

嘆完個咖啡再去做埋個facial,借機會瞓下個覺就同傻仔會合

今年已經係我第四年參加,參與人數一年比一年嘅多,由最初五千,八千,去到今年有成萬人參與,好熱鬧

而今年亦都係最凍嘅一年,之前都仲可以着短袖衫起行,但今年遇著早來嘅冷鋒,得十三度,咁就要着到成隻粽咁

步行路線今次就响新界區,就晒我呢個沙田友

由沙田運動場出發經吐露港,大埔海濱公園,大埔工業邨,汀角路去到大尾督水霸直昇機坪爲終點

全長二十公里,預計需時三個幾鐘頭先可以到達

從派發嘅小冊子，十一張相裡

內有友友嘅玉照,上年佢有份參與被大會攝影影捕捉到用於今年小冊子上,第二日我都即刻話番俾佢知,佢都好開心,而我都好雀躍

我哋係想早早到出發點可以11:15第一批出發,可惜都係我遲咗少少,要攪到第三批先至到我哋,連厠所都無去,因為勁排長龍,連相都影唔切,呢張係傻仔摧三摧四我快去出發區時影嘅,都唔知影咗啲乜

有人响樹扮得扮馬,我唔講你哋都唔知佢哋响樹扮護士,因為我部相機竟然响緊要關頭無電,唯有用電話影住先,質素自然係惡劣啦!!

仲有佢~鄧浩光嘅參與,依家我先至知佢曾經係飛魚王子

出發前就正正企响我哋後面

佢都好有心有心

出發囉!!我哋起步果下衝出重圍先可以避開人群彈出,唔係响後面有排都迫唔上

去到近馬場時有指示牌要求我哋攞出佢哋派發嘅電筒出嚟玩人浪,攪攪氣氛

亦响呢個時候內急得我C,又凍又急,要行到去吐露港先至有第一個公厠,遠處一見就直奔過去,點知已經有成十幾個人等緊。攪咗15分鐘先至到我,落後咗好多

吹漲得佢之後就密密有公厠出現,第一個就隔起步點咁遠先至有,差點兒就出事啦!!

去到矇眼大考驗時就有一列十幾人排住隊一個跟一個矇住眼嚟行

非常認真

去到大埔海濱長廊終於有嘢睇啦！！時間已經差不多一點幾，九公里已經行咗，仲有十一公里未完成，但已有短訊收到第一個已到終點，佢可以早過我哋好多返屋企抖啦！！

沿路都有好多補給站，有麥提沙，旺旺仙貝，ＥＤＯ朱古力批，話梅糖，益達香口膠，卡夫芝士餅，芝麻梳打餅，仲有珍寶珠食添！！都有好多種類

行到三點幾終於到達，足足行咗有四個小時，除咗等厠所之外都無停過

去到終點傻仔剩係掛住攞個早餐食，我都未試過三點幾咁早食早餐嘅

傻仔ＣＡＬＬ咗架的士，一上到車個司機就問長問短，沿路做咩咁多人行，傻仔就好比心機答佢，而我就一粒聲都無出，攰到Ｃ

搭車途中一陣就瞓着咗，瞓到口水都流埋，仲以為起唔番身添！！

第二日先識摷下個百寶袋內有啲乜

仲記得行到去比華利山時有一幅大大橫額寫住比華利山別墅支持盲俠行，仲有佢哋供應嘅樽裝水派添！！

今年嘅成績差咗，第２０２，上年都有第１５＊個到終點，真係一年比一年差

今年仲要多謝傻仔嘅出錢又出力，陪我行畢全程，多謝有你相伴，無限感激，無以爲報

仲有懵婆好有善心捐助我二百元，同埋當日出發前發咗個短訊嚟支持我，好多謝佢

感激兩位支持