廸欣湖

星期六3/10中秋節正月十五,我就十一點幾起身就同傻仔落咗去花園餐廳食我嘅第一餐,咖哩雜菜意粉,又幾好味喎!!

之後佢問我去邊,而我就想去郊外逛下,咁就去廸欣湖啦!!

好轉折咁搭機場巴士再响青馬收費亭嘅巴士站轉乘R8入去廸欣湖

去到先知原來廸欣湖都係廸士尼管理,係屬於佢哋嘅一部份,所以啲屋仔都整得好靚,有啲厠所仲係獨立一間,好似去咗酒店房果啲咁正添!!

相片果間係7仔,簡直係救命站,因為當日陽光普照,熱到你傻,乜嘢飲品,雪榚都飲埋食埋先降到啲溫度咋!!

去到呢個湖真係好正,我好鍾意,係假期必去之地,山明水秀,湖光山色,又有一大片草地,好有外國果啲中央公園FEEL,香港竟然有啲咁嘅地方喎!!!

咁大片草地緊係唔好嘥,野餐就啱晒!!

如果有車仲可以帶埋架單車嚟踩,雖然果樹都有得租,但都要百幾蚊一個小時,不過係有前後座嘅家庭式單車

見到有個老豆响樹扮牛牛俾個仔騎又幾溫馨喎!!

仲有水上單車,我就好想踩啦!!但傻仔嫌熱得滯唔肯,老我幾年就真係幾年,佢話留番冬天先至嚟踩過,我話香港無冬天果喎!!咁佢就話廿度以下就嚟啦!!你話架!!

見到啲收費係兩人一小時百二蚊,傻仔話以廸士尼收費嚟講算唔貴,我心諗你已經中廸士尼毒中得太深啦!!

欄杆中間有米奇頭標誌

同場已發現有三對新人响樹影婚紗相,都係貪佢地方夠晒正!!

附近就係廸士尼列車經過地方

湖水極之乾淨清澈

但可惜係收七點鐘,如果係可以延長至夜晚十點就仲正,可以响果到嘆個月餅,賞個月咁就真係一流!!!

唯一美中不足係獨欠一間餐廳暏!!對住咁靚景開餐真係心情都愉快啲!!