飛驒高山之旅2007 - 第四天 (下)

2007年9月4日(星期二)

大約11:20am 就番到高山市, 跟住就行去"高山陣屋"參觀, 呢度係幕府時代嘅衙門. 入場費每位Yen420.

入去前要除低鞋, 門口重有大量白色膠袋借出袋住自己對鞋, 認真攪笑~ 唔知係咪時間尚早, 參觀嘅人唔太多, 原本已經幽暗嘅環境, 顯得更加詭秘~

裡面有審訊嘅房間, 亦有住人嘅房間, 廚房, 起居室等, 面積好大.

D房左穿右插咁, 玩"伏呢呢"就一流~ 重有當時D人用過嘅餐具器皿, 最後重有間行刑房, 又豬籠又比大石壓咁, 認真殘忍~

參觀完, 就喺附近行吓影吓相.

行到攰攰哋, 就去咗"上三之町"一間茶屋"喫茶去"抖一抖飲杯嘢. 我哋坐嘅係閣樓, 細細間, 環境好舒服, 其餘都係日本人, 個個都係傾吓計食吓甜品, 我哋都hea咗好耐~

日本豬扒~

途經見倒大過個頭嘅發光海膽球~

行到三點幾, 就番旅館攞番之前寄存嘅行李, 當然要留番個message多謝人哋嘅款待啦~

行去車站途中, 又經過我嘅"丸明", 梗係影番張相留念吓啦~

騎著電單車的猴寶寶~

行到車站附近, 專程嚟搵呢間著名嘅"米丸家"牛肉丸, 其實佢嘅做法同八爪魚丸一樣, 唔同嘅只係裡面用咗飛驒牛肉, 果然無介紹錯! 真係好好味喎~

之前已經打咗去酒店, 約咗四點鐘喺車站等佢哋揸車嚟接我哋, 等車期間, 見倒個天出現耶穌光, 即刻襯機影低佢.

呢間叫"萩高山"嘅係間溫泉酒店, 係處於高山市嘅山上, 所以可以飽覽整個高山市景色, 我哋到達時啱啱黃昏, 正值日落. 酒店嘅服務果然係唔同D, 嚟招呼我哋嘅除咗一個男侍應, 重有一個婆婆, 個婆婆睇嚟都有六十幾歲, 但佢竟然幫我哋抬行李, 攪到我哋幾唔好意思, 後尾先知原來佢係負責晒我哋呢兩日嘅起居, 包括上餐,舖床, 同我哋一切嘅要求.

入到房真係嚇咗一跳, 間房Q咁大, 個阿婆倒晒茶又拎D和服出嚟教我哋著, 又同我哋講一大堆日文, 靠估都大約知佢講乜嘅~

跟住, 我哋就出去出面周圍行吓~ 間酒店分本館同新館, 真係幾大間.

Check-in時, 我哋已經book咗6:00pm浸溫泉, 一來廢事同人爭, 二來聽講食飯前浸會好D~ 不過呢度嘅溫泉並唔係任浸, 係要比錢...重幾貴添~ 不過一場嚟到, 無理由唔浸吓啫~ 一路浸一路睇住日落, 又真係幾爽~

浸咗半個鐘, 沖完身, 番到房已經見倒一檯都係食物, 阿婆效率果然高! 跟住陸陸續續攞埋其餘食物嚟就可以開餐喇!

大碟細碟乜都有D, 有D都唔知係乜就擺落口, 不過樣樣都幾好味~

食飽飽, 阿婆又出現~ 除咗幫我哋執好晒檯面嘅食物, 重一個人舖好晒榻榻米, 見佢氣來氣喘, 真係好想幫幫佢, 但佢示意我哋唔駛幫手, 唯有靜靜坐埋一邊啦~

呢間就係我哋住嘅房喇~