2007年9月7日(星期五)

話說禽晚打大風, 一起身即刻拉開窗簾睇睇出面咩環境~ 竟然陽光普照喎?         洗完面就落去食咗早餐先, 雖然呢間係商務酒店, 不過個早餐都幾得咁~ 好多嘢食揀~  食完執好嘢就出發喇!!

今日嘅目的地係"名古屋城", 乘地下鐵"名城線" 去到"市役所站"大約10mins, 出站沿住指示行, 好快就搵倒~

感覺上, 名古屋城比大阪城細好多~ 但入場費都要每位Yen500, 都幾貴~

襯住呢日天朗氣清, 試吓用部機影吓人像啦, 有個名古屋城做佈景, 效果都唔錯丫~

跟住重玩埋跳高定鏡添~ 喺度都唔知玩咗幾耐~

跟住就上城樓參觀, 其實大致上都係果D 嘢啦~ 又係睇吓以前有咩將軍住過呀, 以前D武器盔甲咁啦~ 不過我都影低咗好多模型嘅相, 方便第時用嚟參考嘛~   呢度重有條實物原大嘅"金鯱模型" 比人坐上去影相, 呢條金鯱係放喺城樓最頂位置, 係呢度嘅吉祥物~ 最頂果層當然大把手信你買啦~

行咗個幾鐘就沿路出番去~ 又見倒"到此一遊紙板"? 梗係要影啦~

沿住指示行番去地鐵站, 一路行又係一路影~

喺地鐵站附近, 見倒呢棵植物開滿晒唔知咩花, 既然櫻花又未睇倒, 唯有當佢櫻花咁影啦~

12:15pm 就番到"榮"區, 就喺Oasis 21附近行吓街, 影吓相咁~ 呢座Oasis 21嘅設計其實都幾特別~ 好似隻飛碟咁, 上層重係一個噴水池, 喺上面係可以隔住水望倒落地下添~ 感覺幾清涼~

可能天氣好啦....襯埋個電視塔一齊影又幾靚喎~

行行吓重見倒部Dream機, 不過而家香港都有得賣咯~

因為酒店就喺附近, 見行得疲疲哋, 就番酒店放低D戰利品, 抖抖先再出動~

休息咗陣, 2:30pm就出擊....搵食!  PigPig 喺網上搵倒間專食扁烏冬嘅老舗, 扁烏冬係名古屋嘅名物, 即係一定要食啦~ 揸住地圖係咁搵, 喺條街度左穿右插, 搵咗好耐先搵倒, 果然皇天不負有心人~ 一坐低就即叫每人一客扁烏冬套餐! 除咗扁烏冬, 重有一碗味噌豬扒飯, 烏冬係冷食, 加落特製醬汁度食, 果然名不虛傳喎~  而豬扒飯亦好香口, 塊豬扒重好軟添~ 正!!

食飽就喺附近行吓, 後尾重行咗入一間藝術中心度, 樓底好高好宏偉, 果度啱啱開緊畫展~

一路係咁漫無目的咁行, 行到疲疲哋, 就搵咗間甜品店坐低食個Tea先~ 每人叫咗個 Tea Set, 任揀一件蛋糕加個雪糕, 再揀杯嘢飲~ 掂喎~

食完Tea, 大約5:00pm, 又再繼續行, 行行吓都唔知行咗去邊~ 睇番地圖先知原來已經行咗去第二個區"大須", 已經行咗幾個地鐵站都唔知~  不過一路行一路睇吓嘢都幾好丫~

最後行到"大須觀音", 呢度有間供奉觀音嘅廟, 果時都已經天黑, 影咗幾張相就行番去搭地鐵番名古屋食飯~

原本又搵咗間食鰻魚飯嘅老舗地址, 諗住搵嚟食~ 但今日實在行得太耐, 而且天黑又難搵路, 搵咗段時間, 到最後都唯有放棄~因為鰻魚飯又係名古屋名物, 所以其實周圍都有得食,後尾就去咗另一間食~

鰻魚飯嚟到, 一打開蓋.....哇~ 香到呢~ D鰻魚燒到鬼死咁靚~ 喺名古屋食鰻魚飯, 有三種唔同嘅食法, 侍應會比張步驟說明你跟住食, 三種食法都有唔同口味, 有得食又有得玩, 又幾得意喎?  我哋重叫多一客鰻魚蛋卷, 雖然飽, 但都真係好好味~

食完又行多陣, 因為"HERO" 喺9月8號首影, 所以成個地鐵站都係木村~

跟住又行咗去Oasis 21, 今次係想去影夜景~ 估唔到夜晚睇重靚, 打晒燈重似隻飛碟~ 加埋個電視塔...好似支火箭咁~

今晚係最後一晚留喺名古屋, 足足行到十一點幾先捨得番酒店~ 聽日就要走, 重要執行李添~

待續.......