大衛的苦情∣我的最痛

「我在困難之中為耶和華的殿預備了金子十萬他連得，銀子一百萬他連得，銅和鐵多得無法可稱。」

                         －代下二十二：13

大衛臨死前，對所羅門的叮嚀讓我想了很久都下不了筆。為甚麽大衛特別提到〝我在困難之中〞呢？讀NIV版的英文翻譯就更奇怪: “I have taken great pains to provide for the temple of the Lord…”查看原文 “困難” 其實是 “afflictions” ，在創三十一：42雅各向舅父拉班提到自己的寃屈時，用的也是這個字，不過就譯作 “苦情” 。查這個字的字根還有 “沮喪”(depressed) 的意思。一百年前兩位德國解經家Keil & Delitzsch認為這個字不是指大衛吝嗇才覺得痛苦，而是他(跟雅各一樣)工作非常辛苦才有這筆積蓄的意思。

不過，大家不妨想想大衛邊有打過工啫？出嚟行嗰陣已經打低歌利亞，跟住帶埋班騎呢怪去收保護費，做咗皇帝都係打人先食埋人地份國庫。各位，當時又無投資銀行，你話大衛為上帝預備咗3750噸黃金及37500噸白銀，咁究竟D錢又真係喺邊處得嚟呢？你估真係有好多番邦進貢咩？

歸根究底，大衛基本就係搶番嚟。如果真係咁，我開始明白大衛點解講 “我在極大的痛苦中” 的意思了。其實一字咁淺，大衛一心想為耶和華建殿，無錢就去搶，結果上帝唔俾佢起聖殿因為 “你在我眼前使多人的血流在地上。”(vv.6-7) 唉，大衛個心係好，但卻用錯了方法！我睇到呢度都覺得好唏噓，就好似你為了所愛的人做了很多事情，愛人不特止不領情，還說你是徹徹底底做錯了！俾著你係大衛，你可以點呢？唯有係死之前同個仔呻咗一生最遺憾的嘆喟。

10月13日是我出院一周年，這一年你猜我想得最多的是甚麼？咪就係睇完呢節聖經就翻查幾十年人有無用錯方法事奉神囉！愈想就愈心寒，結果，連拿起技筆寫blog都無心機。八月開始，承蒙某教會不棄，當了她的義務傳道，講真，很多時候崇拜時坐在下面聽道，愈來愈感受到自己的不配。特別今早有人很尊敬地同你打招呼：「陳生！」我就諗我係咪咁值得人尊敬呢？唉！好似大衛咁，人睇你梗係好，為上帝儲咗咁多錢，殊不知我卻原來“在極大的痛苦中” ，又有幾多人知呢？

記住，大家唔好學我同大衛呀，共勉！