與神同在的33年

有網友問經歷唔到神與自己同行點算？不如我換轉另一個角度諗呢個問題：「點解你咁渴望神與你同在？」我相信沒有人會否認史上唯一真真正正經歷 “Immanuel”的只有瑪利亞一人，因為神在她肚內足足有十個月。但問題是，若你是瑪利亞，你怎樣看〝神與你同在〞這回事：

1.      既然我生嘅係龍胎，點解唔喺養和而要喺雞寮？

2.      點解我生嘅係救世主，我竟然要走佬？

3.      點解我D三歲以下的表弟妹通通死晒？

4.      點解我幫個仔攪奉獻禮，有人話我將來會心如刀割？

5.      點解〝神與你同在〞都會唔跟我返屋企，衪，真會與我同在嗎？

6.      點解我搵仔，衪反過來問：「邊個先係我阿媽？」

7.      點解我叫阿仔係婚禮幫手，佢竟然話：「我與你何干？」

8.      點解係都要我認你的門徒做我嘅仔，我唔要睇住我個仔死，我寧願要“Immanuel”！

做耶穌阿媽好幸福嗎？若我是瑪利亞，已經連約瑟都唔知會或商量就應承上帝去生仔的情況下甘冒沉豬籠的死險，上帝呀，上面種種是否對我過份了一點？

請大家不要誤會，我不是說耶穌不孝，況且教會總會找到上面八條問題自圓其說的解釋，我只是想問：「有一個叫〝神與你同在〞嘅仔，你覺得神與你同在嗎？」

我不知大家過往的屬靈經驗如何定義〝神與你同在〞的心理狀態？我覺得大部份信徒睇〝神與你同在〞其實係麻鷹捉雞仔的遊戲，魔鬼就係麻鷹，上帝係母雞，我地係雞仔。講真，未信主前我地已經渴望做雞仔，信主後又有乜分別啫？我地咪一樣係雞仔！

〝神與你同在〞＝平安？喜樂？入迷(trance)？我想，我們真正要問的是：「我們渴望與我們同在的是個怎樣的神」？