第10個月的成長驚喜

呢個月, 小吉學野既速度真係好快, 每個星期都俾好多驚喜我同小吉爸, 可能如果我地日日對住小吉, 都唔會有咁大surprise, 但一個星期只係陪佢2日, 就真係覺我個轉變好大好大~

趁今日係佢11個月大, 等我紀錄返今個月佢既驚喜先........

行為方面:

1. 識得自己放手行幾步喇, 不過唔知係唔係呢幾日跌得多, 成日去到無得扶既地方就自己坐底爬去扶住野, 繼續行......... (又俾小吉爸話佢回塘)

2. 終於都識爬喇

3. 識得自己 & 俾手指同我地一齊點蟲蟲, 一悶起上黎無野做, 就會"隊"隻手指俾我地點蟲蟲

4. 終於都識得係高處落地下係掉轉自己, 用對腳落地, 之前佢竟然用個頭"中"落地

5. 聽到歌聲, 我地叫佢一齊跳舞, 佢會手郁郁腳un un一齊郁

6. 激嬲左mami, 識得雙手輕輕摸mami塊面, 同mami頭貼頭, 之後又黎一個招牌笑容, 阿囡, 你咁冧, 我好難嬲你&教你喎

7. 識得同mami share食物, 食緊咩都好, 叫佢俾mami食下, 佢就會笑, 即刻俾我食~~

8. 佢一做完一件叻事, 我地就會讚佢, 久而久之, 佢一做完叻野, 就會等我地讚, 拍下佢個頭, hug 一 hug佢, 錫佢.......宜家我地做完呢一連串動作, 我地就會叫佢, 俾d掌聲自己, 佢就會拍手掌

9. 唔知點解, 一睇到hk寬x廣告, 見到牛頭馬面手指指唱豈有此理, 佢就會對住電視一齊舉高手, 手指指, 宜家我地一對住佢講"豈有此理" 佢都會舉高手, 手指指...... (電視既影響好深遠又有例証! 不過我唔會就此一d電視都唔俾佢睇, 佢係一個正常人, 都需要電視既, 最多唔俾咁多同埋scan過先俾佢睇, e.g.每晚新聞我都會照俾佢睇!)

10. 超鍾意動物, 無論實物/圖片/電視見到都超興奮, 仲成日想摸佢地.......

11. 超鍾意撩人玩, 無論搭車搭lift, 都一定撩d陌生人, 同人say hi &笑, 搞到周圍既人都好開心, 仲試過拖實一個唔識既姐姐, 要同姐姐玩

12. 經過2堂既幼潛我地發現, 小吉係一個好合群既小朋友, 亦都係好留心上堂既小朋友, 小朋友玩佢又會走埋去一齊玩, 梁ee講書佢又會坐定定聽ee講

13. 見到自己既相會尖叫, 問佢係邊個黎架, 佢識拍下自己心口仔

14. 模仿力都好強, 試過係麥記見我同小吉爸點茄汁食薯條, 自己又用自己揸住既包包黎點

15. 好鍾意睇書, 有時仲會自己一路睇, 一路自己講bb話

食量方面

1. 起身一支7安既奶奶, 同婆婆一齊食早餐有半碗私家通粉, lunch會食一碗粥/粉, 之後又再飲6安奶奶, 又會食下生果/餅餅, 6-7pm又食一碗粥/粉, 臨瞓再飲7安奶奶, 一星期有2-3晚都會2am飲多支6安奶, 如果唔飲就會去到5-6am先飲

2. 試過蛋白/花生醬都無敏感, 因為仲未食大仔奶, 婆婆煲粥都會加一隻蛋黃&半隻蛋白

3. 好鍾意識包包 & 蛋糕........

語言方面

1. 俾野佢, 叫佢講"謝謝", 佢會跟住講"謝謝"

2. 睇animal書書, 我開始同佢用英文, 宜家一睇到"cat", 佢會跟住"cat", 一睇到"duck", 佢又會跟住"duck", 沖涼見到沖涼鴨, 又會自己係到"duck duck"聲 (不過都唔sure佢係唔係真係明呢?)

好多時佢做左一d好驚喜既野, 我都唔係好敢sure係佢識, 或係撞彩, 不過我都會照讚佢, 佢又會好開心, 到下次佢又會再做返出黎, 好似"謝謝, 開頭我都唔敢相信佢係識, 但讚完佢錫下佢攬下佢拍下手, 到下次佢又會再嘗試俾我地睇....... 唔怪到huggies 廣告話, 攬bb多d會增加佢地既智慧喇~~