網誌分類：小吉媽的說話 |
今日我又忍唔住, 鬧左小吉一餐, 到佢返婆婆到時, 佢都唔係好睬我.........
事源, 出門口前我幫佢沖涼, 個衰豬上水之後就發脾氣要玩水, 我已經同佢好好聲氣講, 唔可以係水咁耐, 沖完涼要起身麻...... 但一個發脾氣既小朋友又點會聽好言相向呢?? 我一直忍佢, 幫佢包片著衫, 佢一直扭扭扭........ 就係包好片, 著左底衫既時候, 我忍唔住好惡咁同佢講 : 你夠喇, 扭夠喇, 沖完涼就要起身, 唔係你想點就點架, 愈大你就愈唔聽話, 同你講道理你唔聽, 係唔係次次都要我打你pat pat?? 小吉當然立即安靜望實我, 之後拍下我隻手, 我依然同佢講 : 我唔睬d成日扭計既小朋友架!!! 佢就好細聲咁飲泣, 到著晒衫就立即要daddy抱..........
返到婆婆到, 我同婆婆同時抱佢出黎, 佢就即刻俾手婆婆, 我知佢嬲我架, 不過我覺得我又無話錯佢!!! 但見到佢唔睬我, 我又唔開心喎.......
返屋企我不停唸, 係唔係我唔夠耐性呢?? 係唔係我對一個8個月既小朋友太嚴厲呢?? 下個星期小吉返黎, 我唸我要試下再俾多少少耐性, 睇下有無一個方法, 大家都會舒服d, 小吉又會聽話d先得........
行行媽‧日行一誌 2008-04-11 23:16
Secret Wish 2008-04-11 21:39
海豚 2008-04-09 15:16
其實我都係個好無耐性o既媽咪...我最慶就係曦曦唔訓覺，或者半夜扎醒，暗極都係喊o個時，因為我唔夠訓o既戰鬥力係最弱o既！不過之後都會好內疚囉，覺得阿b 始終係細....
其實你都無錯o既，的確唔可以由得bb 想點就點！不過真係，雖然佢會知你係鬧佢，但佢唔係太清楚你點解鬧佢...我睇書講話bb 0-3歲係無律期，即係佢三歲前，係唔太識遵守紀律。咁當然唔代表三歲時我地唔使佢遵守任何紀律，但如果佢真係遵守唔到，都唔好太上心太激氣，始終佢仲細嘛！
其實小吉佢都係無錯，佢都唔知沖太耐涼會冷親，佢只知佢想沖多陣！所以佢扭都可以理解，不過或者你唔好鬧佢，或者唔好鬧咁多句！
行行媽‧日行一誌 2008-04-09 00:35
嘩！行行仲係一舊飯咁，唔知人鬧佢架！不過都開始有脾氣啦！
其實你呢d都唔叫冇耐性吖，亦冇做錯喎，你嘅出發點係關心佢，唔通見佢咁唔開心，放番佢落水玩至岩？你又唔係冇情情鬧佢。係可以俾其他嘢轉移下，但咪即係俾佢得逞？至多唱隻歌仔佢聽還可以。
小吉已經咁有表達力同接收力，一定已經識分邊個蝦得邊個唔蝦得！
不過，淨得你1個做衰人，又真係慘慘！
你又不防睇下下星期佢會唔會又扭唔上水，咪知道究竟小吉有冇learn a lesson咯！
╭☆ 小瑜媽咪╭☆ 2008-04-08 17:04
其實小瑜成日都會咁, 我己經練到百毒不侵→由佢扭..當然有時佢扭得太耐我都會發火..但通常都係我都好眼瞓果時先會咁
其實好多時我都同佢講道理,但佢係唔理三七廿一都係勁喊...咪我有我講佢有佢喊囉...喊喊下我都唔理佢,佢就無癮收聲架啦..或者塞個toys俾佢..佢就收聲囉...
其實我都好無耐性既人, 但係湊咗個女差不多9個月, 我覺得其實係佢訓練緊我既耐性囉
Cary 2008-04-08 01:05
um... 我唔知點解對住仔仔好有耐性!!! 而我其實不嬲都好無咖~~~ 老公都話見到我對住仔嘅態度, 覺得我原來其實係唔愛佢咖~~~ 哈哈~~~
不過如果真係覺得好忟好嬲, 都好應該表達比bb知道~~~不過佢地開始識嬲我地咖喇!!! 多數bb都係一歲開始有脾氣, 係小吉咁資優可能更早添, 到時仲激氣咖~~~
我個人就覺得講道理好d, 哦下佢, 又哄下佢咁啦~~~ 哈哈~~~ 一齊努力啦~~~
小吉媽咪2008-04-08 01:22
唉~~~ 其實我都知自己對好多人同事物都好無耐性, 所以都好怕對小吉無耐性, 而且我知道小吉係一個極度唔鐘意人鬧 既小朋友, 可能愈鬧佢仲愈反抗, 所以我都成日提自己要溫柔d慢慢講佢知........ 希望我地快d搵到一個方法大家都舒服d, 開心d喇~
加油呀0707mami!!
Linda 2008-04-07 18:27
軒吽bee 2008-04-07 18:09
pigletcoco 2008-04-07 14:37
嵐嵐 2008-04-07 12:45
小吉吉已經好乖嫁啦~ 我鬧亞女呀......佢仲喊大聲d添呀~ 最終咪有婆婆呀daddy呀黎呵番佢囉, 攪到好似我唔啱咁呀~
小吉媽咪2008-04-07 15:50
係呀~ 我都係咁呀, daddy就扮晒好人, 婆婆又係好人, 成家只有我係衰人!!! 唉~~~~~
膽小媽媽 2008-04-07 09:35
babe725 (尤尤媽咪) 2008-04-07 08:17
其實我都覺得有需要時係要鬧,比佢哋知道有咩係可以,有咩係唔得.....雖然我有時鬧完尤尤佢會嬲,我自己都有d唔開心,不過為咗佢第日好,都無法子.....我覺得小朋友最重要係要有禮貌同Discipline....
蝦仔媽媽 2008-04-07 00:18
其實佢地識架, 識得知道邊個鬧佢, 識得嬲人架, 不過另一方面, 我又覺得佢地而家識得試緊我地對佢地嘅尺度, 就例如同一件事, 佢地對唔同嘅人有唔同反應, 就好似有d bb喺婆婆度會乖d. 但對住mama又會曵d, 所以我都會鬧蝦仔架, 雖然無乜用, 但都至少比佢知道佢去到邊個程度mama係會嬲............
另外我想問吓小吉d咳咳點呀?? 蝦仔又係唔清, 但聽到d痰聲好散, 唔實架, 好似就快咳得出咁, 不過我尋日再帶多佢去睇多次醫生, 希望快d好啦~~
小吉媽咪2008-04-07 00:59
有時我都好茅盾, 我一個星期只有2日接小吉返屋企一齊住, 我好想呢2日同佢好sweet sweet, 即係好似d唔係成日見面既情侶, 到見面時唔想嗌交咁呢
, 但有時佢又成日挑戰我既耐性同埋底線, 每一件事我唔俾佢做佢就會扭左先, 睇下我會唔會俾佢......... 唉~ 搞到我都唔知對佢溫柔d好還是嚴厲d好