年結

好似冇寫年結既習慣，但既然瀧師姐(我仲記得呢個名!!)叫到，我即管寫下啦~

工作:
2008年曾經試圖轉工，但由於本人既懶惰同埋頹廢，游下游下咁游左7個多月，結果又回到山頂。
唔係唔想出去闖，只係試過做其他地方同環境，唔慣，唔鍾意。你可以話我唔理性，但我個人認為生命無take two，如果都唔可以開心咁生活，日日返工都要對住一個唔鍾意既環境，咁生存黎做咩?自問由細到大都冇大志，但求開心咁過日子，唔想因為世俗既標準而強迫自己做唔鍾意既事。感謝屋企既體諒，令我可以係冇家庭負擔咁隨自己喜好選擇。

朋友:
2008年係我潛水既一年，除左G4因為義工差不多每個月都見到一次外，其他人都比以往聯絡少左。今年我會努力去約大家架喇~

學業:
其實應該唔係太多人知，係2008年我讀左一陣子會計(當然係基本程度啦~)，但係年尾既時候爛尾。Anyway，我今年既目標係再讀日文。

暫時寫住咁多先~