好嬲!!

雙失了這麼久，最近都有返舊公司做part-time，始終會坐食山崩嘛~(所以各位千萬唔好誤會我屋企好有錢，唔做野幾個月都得，其實我係貧苦人家黎架!!)

結果昨日返工就目擊公司某位我成日都覺得佢係pk王既犯眾憎同事，出言侮辱許生，儘管我係事後對許生循循善誘，以理性既角度去分析同安撫佢憤怒既心情，但我諗許生一定唔知道，其實當時我心裡面係嬲到想一個釘書機"車"埋去個pk度，再用唔會輕易講出口既咀咒人全家粗口鬧鑊甘既佢!!!

其實呢位pk王同我並冇任何仇口，老實說，初初(記住只係初初)佢因為d古怪行為&廣東話唔正而有時成為取笑對象，我都有d同情佢，但之後我發現呢d根本係佢自己攞黎衰，我就完全唔同情佢(當然亦都冇落井下石，呢d唔係我作風)!!其實佢份人好多時會有d古怪既行為，唔知佢係咪想突出自己啦，我不予置評亦唔會因此而對佢有咩偏見，至多係覺得奇怪，但個pk最衰係階級觀念重，對上司級既絕對係阿諛奉承，咩說話/事都做講/做得出，而對於我地呢d同佢差唔多level既 program sec.都冇咩，係有時d自私行為令我地想頂佢個肺，但對於一d佢覺得係低級既同事(注意，係佢覺得)就絕對地"揸住雞毛當令箭"，絕對係冇好聲好氣(除左有時自己衰左要人幫手之外)，所以我地一直覺得呢個係馬屁精，同某(幾)位同事同列公公之列，人稱郭公公是也!!

昨日下午已經聽媽媽同事話個pk質問佢係咪係佢個位拎走d cert啦~(事實上係佢老細拎比媽媽既)，但佢既語氣係質問，即係當人係賊!

而另一方面，呢個pk同許生其實都素有積怨，繼早前 "Ta姐approval碎紙"事件後，昨日又發生左 "無謂人"事件。事緣上司Amy交帶左d工作比呢位pk，之後許生行去同Amy講公事，無耐pk突然同Amy講 「Amy你頭先同我講咩?頭先d無謂人同我講完野我唔記得左。」而事實上，Amy同佢講完野之後到佢講出呢句說話之間，只有許生因公事同佢講過兩句野!言下之意，佢講既無謂人係邊個就真係呼之欲出啦~所以許生好嬲咁質問佢「咩無謂人呀?頭先好似得我同你講野咋喎，你講清楚d喎無謂人!」面對許生嬲到爆既質問，有人"淆底"講「我講下笑je~」，所以話呢d正pk黎架，係反面就唔好"淆底"啦，驚死自己會係老細面前有壞印象~佢真係講笑既話d技巧又真係差到死，成日都得罪人，係出面既話一早比人打死啦~而且老實講句，如果你係講笑而令人嬲，係咪應該say sorry，或者講返句"唔好意思"呢?但佢冇囉，一d家教都冇!!!所以大家覺得佢係咪真係講笑呢?

之後夜晚食飯後，同許生作心理輔導，為免火上加油，我係好理性地叫許生下次遇到同樣事件唔好衝動，因為我真係好擔心許生火摭眼講左d衝動既說話或者做左d衝動既事，同d pk反面事小，d小人心胸狹窄點知佢會做咩小動作架!!到時比d pk小人利用或造成令自己蝕底既局面就唔抵啦 ~總結係，凡事冷靜同慎言，唔好同d pk小人一般見識，要學習氣定神閑咁罵人，殺人於無形方為高手!!(共勉之)