大仔又得獎喇…

好開心呀……

大仔學校早排舉辦咗一個攝影比賽，主題係環繞學校生活趣記（係咁上下掛……查實唔係太記得）。感謝主，大仔得咗小學生組冠軍

星期一佢同我講……

Joshua：｢媽咪，派咗通告，話我得咗攝影比賽獎喎…｣

媽咪：｢係呀，咁叻仔，得咗個咩獎呀…｣

Joshua：｢唔知喎…事旦啦，咩獎都無乜所謂啦…｣

媽咪：｢好……｣

過咗一陣，佢拎將通告俾我睇……

媽咪：｢阿仔，你攞咗嗰冠軍喎…｣

Joshua：｢係咩？（自己睇番張通告）依～係喎…我攞冠軍你開唔開心呀…｣

媽咪：｢開心，咁你呢…｣

Joshua：｢我都開心架，有得參加已經好開心，都無諗過攞獎嘅，依家仲係冠軍添喎 ，梗係開心啦…｣

Aaron仔：｢係啦…至在參與之嘛，有冇獎都無所謂啦…｣

媽咪：｢嘩～細佬都識喎，好叻仔呀…｣（我心諗：關你咩事啫～學人搭訕）

Joshua：｢（之但係佢好快趣咁話）嗰日我要當值喎（因為今個畢業禮佢有份企門口歡迎嘉賓）如果我有份領獎就唔可以當值架喇，咁你快D打電話同我隊長講，叫佢搵人替我嗰位先得…｣

媽咪：｢洗唔洗咁緊張啫……陣間你自己打電話同佢講啦，自己嘅嘢要自己做吖嘛…｣

呢張就係大仔得獎作品喇

評判評語：母子兩人流露濃厚的親子情。由母親的眼神能表達對兒子的感情，氣氛和諧而背景相當整齊。

紅箭咀嗰D係佢其他參賽作品（每人最多可交六張相片）

黃圈嗰張係我參賽作品嚟架，係咪都幾得吓呢……可惜無獎……嘻嘻……至在參與啫

後話：查實整個對我哋嘅話語氣都好鬼平淡，雖然攞咗冠軍，但係大家都冇乜興奮感覺，或者咁講～真係無乜所謂……我反而覺得大仔緊張有冇人替到佢當值，多過興奮攞獎囉～叻仔

話雖如此，小朋友即係小朋友，大仔都有要求我哋買份禮物獎勵吓佢架；Daddy就決定俾100元佢自己選擇買咩禮物……，結果佢用55元買咗一盒｢爆丸｣，用32元買咗一包｢恐龍｣玩具；我問佢點解要買包恐龍玩具而唔買埋爆丸呢？佢話諗住買嚟同細佬一齊玩，事關佢有禮物而細佬就無，所以買D恐龍同細佬一齊玩，咁樣細佬都叫做有D禮物喎……～叻仔

咁～仲有嗰13元呢？登．登．登．登……喺唔知買乜好，但係又唔想求其買D嘢嘅情況下，大仔選擇咗入落佢自己個錢箱裡面儲起佢……～叻仔

今晚姑媽仲請咗我哋去食pizza慶祝，不過開心到唔記得影相……