三日兩夜做咗乜…

大仔上星期五學校旅行後便開始復活節假期，足足放成兩個禮拜(20/4先放學)，嘩~洗唔洗放咁耐呀…而Aaron仔就返埋今日開始放，又係20號先返學…尋日老公day off，夾夾埋埋公假有3日假咁多，咁~呢3日我哋去咗邊度玩呢

4/4/09~兒童節
lunch去咗飲茶，跟住去咗紅磡逛咗個圈，咁就一日

呢個黃埔公園有D for長者玩嘅健身設施，喂~細路，咪同阿伯爭嘢玩先架，讓吓伯伯好喎

呢兩個圈究竟係咪for灑太極用嘅呢…………答案~係！
上面嗰份係我買嘅兒童節禮物，下面就係Daddy買

5/4/09
原先諗住返完教會後中午去鯉魚門行吓，點知天黑黑驚落雨，結果去咗個甚麼｢圓方｣商場行街，唉~一句講晒，太高檔喇，絕對唔啱我呢個C9，都係影幾張相就走人吧，跟住去咗尖沙咀玩具反斗城玩，反斗城係佢倆個至愛

6/4/09
老公一朝早帶咗大仔去西頁碼頭釣魚(查實係大仔晨咁早醒咗啫…返學又唔見你咁早)，可惜落雨呢，老公話呢D天氣釣唔到魚架喎，不過應承咗大仔帶佢去釣魚，咁咪去玩吓囉…我就等埋Aaron仔放咗學之後入去join佢哋

之不過，大仔居然釣到3條手掌咁大嘅泥鯭喎，老公就食"白果"，哈哈~~睇怕釣唔釣到魚呢家嘢唔關天氣事囉，老公~你今次No喇…哈哈

最後，老公話得嗰幾條咁少咁細嘅魚，唔帶返屋企喎，咁啱有個家庭嚟釣魚，大仔就將D魚送咗俾個妹妹