米奇樂園

真係估唔到，好不幸舖頭有米奇出現！都唔知o係邊度引佢番黎，應該係裝修之後先出現，因為裝修前狗糧都無比野咬過！

見到小強可以狠狠地打死佢，但見到米奇真係要溫柔D！唔溫柔D嚇到佢四圍走，佢就會同你玩捉迷藏！

第一次見到佢既時候，仲以為好順利咁掃左佢出門口！點知佢當我地舖頭係米奇樂園，四圍走，四圍痾，四圍食，四圍咬！值到發現佢D便便，數量太少點諗都唔想真係有米奇出現！當數量越多而無處不在既時候...，同事就去睇下D狗糧發現D狗糧袋穿哂..........OH !NO!

就如我舖頭每日都播既一句說話，"XXX是我的家"還以為將d狗糧放入個膠箱，等佢食唔到點知隻米奇真係餓到傻傻地，咬放狗糧既膠箱！雖然話佢都係食唔到，但睇到咁既情況都會覺得恐怖！

有一日，發現電話線被咬斷，買番黎既薯片零食都被咬過真係忍無可忍，走去買個老鼠籠捉米奇！但邊會咁容易，掛响個籠入面比野佢食又唔食，遍要去搵其他野咬，好似阿媽咁講要捉佢就一定要神神秘秘，唔好比咁多人知，唔好咁大聲話要捉老鼠，因為隻野係會知道！好無奈放個籠响度好多日都引唔到佢！

但有一日點都估唔到佢又再出現............

同事想去廁所發現馬桶裡有異物，心諗邊個咁衰開大唔沖水！但睇清楚d佢眼仔精靈！嚇到同事走返出黎，我同另一位同事都睇過！正實佢唔係一舊屎！

諗住沖多幾次水試下可唔可以沖走佢，雖然話咁大隻野沖走佢可能塞住個廁所！

但沖水對佢黎講係無用，沖完第一次仲見到佢個口郁下郁下好似飲緊水！再沖多次，發現佢好頑強！佢用d腳死撐住個廁所免被水沖走，果一刻心諗想為佢鼓掌叫佢"努力！加油！頂住呀！"我走先！

佢係死既都話可以夾佢出黎掉左佢，佢係生既就只好請佢飲d野！等佢無力掙扎，容易d對付隻米奇！先請佢飲漂白水，再醒多支通渠佬！

兩支野加埋夠哂攻鼻，聞多兩下唔係佢死就係倒落去果個先暈底，加上通渠水可能會令佢好high ，咁精彩既場面我地就交比管理處既男丁做，事關我地無乜男丁！

終於好成功將隻米奇沖走，廁所又無塞！呢件事發生於幾日前.......................

而今日返到去好不幸地知道又有另一隻出現，慘過厲鬼纏身.......