背景： 一般嚟講，已經上緊畫嘅戲小弟係盡量唔寫嘅。反正套戲都做緊咯，係龍係蟲讀者大可以自己find out。不過睇完《Doomsday》之後，我覺得唔破例一次實在對唔住良心。要知道今年嘅暑假檔期嚟得特別早，而且一開波已經有《Iron Man》呢啲超班馬，加上排緊隊嘅仲有《The Dark Knight》、《The Incredible Hulk》等強勁對手……好似《Doomsday》呢類名不經傳嘅B片，情況真係未許樂觀。最陰公係部戲唔單止生壞命，仲要改壞個中文名。可能係套戲太難歸類，有關方面覺得好惡sell啦，於是監粗改個片名叫《滅絕生還者》，企圖令「一般觀眾」以為係喪屍電影。咁就真係出事嘞。首先喪屍片喺香港唔算咩馨香嘢，改個咁嘅名其實一啲so都冇。何況部戲根本就唔係咩喪屍片，更加冇可能取悅「一般觀眾」。正所謂恨鐵不成鋼，筆者實在唔忍心睇住一部拍得咁好嘅戲無聲無息咁落畫。唯有喺度向cult友們呼籲一下：雖然依家只係5月幾，不過我肯定《Doomsday》將會係呢個暑假檔最cult、最黐線嘅電影！Go see it, before it's too late......
《Mad Max》x《Escape From New York》 話《Doomsday》難哽，並唔係因為套戲血腥核凸（呢樣就梗架啦），而係導演用咗佢一貫一本正經嘅手法，去講一個其實癲到嘔泡嘅故事。勉強要講，你可以話佢嘅大橋有啲似John Carpenter嘅經典《Escape From New York》；不過當中嗰啲癲喪Punk仔同爛鐵怪獸車，又勁有《Mad Max》嗰類post-apocalpytic films（末世電影）嘅玩味。但係咁樣都未形容到套戲有幾癲。奈何我真係想留返大家入場親自院O嘴，喺到度只能夠再比多些少提示：即係咁，你有幾可睇到有齣戲，會有件巨型刑具嚟生煎人肉吖？就當你睇過生煎人肉，咁你又有冇見過幾百個Punk仔一邊開concert，一邊高舉紙碟等食人肉吖？我再問你 ---- 你估唔估到點解一齣咁嘅戲，會走個中古騎士出嚟同女主角隻揪呢……！？《Doomsday》可以話將啲cult片元素倒入攪拌機，然後瞌埋對眼將佢攪到九彩！最正嘅係Neil Marshal唔似時下嘅cult片導演，要刻意搞到套戲騎騎呢呢，驚死你唔知佢特登搞gag。相反，無論畫面上出現嘅嘢有幾癲喪，Marshal都係若無其事，照樣維持佢嗰種raw raw哋嘅寫實風格！所以如果閣下真係入場，記得帶多兩斤幽默感；一旦見到咩癲嘢唔駛客氣，有理冇理同佢笑國咗先！因為套戲嘅原意亦不過如此。
thestuff2.jpg
thestuff1.jpg
stuff_poster_01.jpg
阿鼻 2008-12-12 10:03
kensome 2008-12-08 05:04