蓬門今始為君開

揸筆揾食都有6年。

一直以為自已好lun鍾意寫嘢，尤其寫所謂自己嘢。至於做雜誌寫稿佬不過係我唔討厭而又做得嚟嘅一份差事。

最近至發現，原來我支筆已經打唔出飛機。而我最enjoy嘅原來反而係寫稿。

其實鍾意寫稿都冇乜唔好 --- 有人畀埋錢要你做你鍾意嘅嘢，幾多人恨都恨唔到。雖然家吓我只係寫份「free-lan癱」，量唔算多。

本來見咁lun多人寫blog亦少不免肛癢，但我諗嚟諗去，自已實在冇乜嘢想講。可以講而人哋又有興趣睇嘅，平日寫稿都已經講得八八九九。其他果啲，我想寫冇人會想睇，有人想睇都唔會想睇咁長篇大論。即使真係有人貪我夠長，我亦再冇咁嘅精力招呼。畢竟都真係冇字瀆好耐。

今次開blog，多少係為咗學中文打字。入行6年竟然仲係小蒙恬，自己都覺得匪夷所思。其實行內嘅手寫派絕對唔止我一個，倉頡同career path並無必然關係。不過用手寫板果種「佛衰唇」，確實係好discouraging。第樣唔講，呢篇嘢我就係用手寫板寫嘅，依家搞lun咗半粒鐘都未搞完，真係慘過擔泥。

Actually，係慘過擔。

何況小弟9月就要重返校園，假如功課要交中文嘅話，真係小爆個蒙恬都唔掂。

我一向最聽內子話，佢話寫blog可以練打字，即管試試。

至於內容，都係我瀨開果幾瓣啦 --- 漫畫評、影評同啲pop culture騎呢嘢。總之怪力亂神屎尿屁，cult．art．geek．chic．eat．fuck．kill……極high與極cheap都有，唯獨冇中間。我份人最憎mediocrity。

蓬門今始為君開，聞得慣嘅歡迎多啲哄埋嚟。