School of Cult Lesson 009: 索女‧壽司‧機關槍……《The Machine Girl》

引言：又或者叫「萌女‧炸蝦‧電鑽Bra」都得。

背景
筆者嘅「貧血病」又發作嘞，係時候寫返啲血淋淋嘅嘢固本培元。咁啱吼咗好耐嘅《The Machine Girl》原來會響8月正式喺日本公映（原先以為佢會直接出DVD），今期一於同廣大血友分享吓呢款保健湯水。部戲要簡單介紹可以幾句講完 ----總之就係日版《Planet Terror》，豔舞索女變咗水手服萌女，核凸喪屍變成黑幫忍者，機關槍義腿就換成機關砲義臂。搞掂，食麵。你問部戲有幾血？我諗夠你下半年沖涼洗面咁囉。

索女‧炸蝦‧電鑽Bra
當然，如果roll住部機影血漿就滿足到你，呢個世界就唔駛有cult片啦。所以《The Machine Girl》最抵錫嘅係佢以黐總掣嘅創意去玩核凸，並且用大量睇到悶嘅cult片元素重新炒出一碟九大簋。講吓故仔先啦：自從雙親被誣稱殺人而含冤自盡，美麗而多才多藝嘅女高中生就同細佬相依為命。本來兩姊弟都叫做撐得落去，點知細佬同另一同學喺學校畀黑幫子女逗到九彩，最後仲竟然命都冇埋。報仇心切嘅家姐畀黑幫劈甩隻左手，啲街坊又因為佢父母係殺人犯唔肯幫拖，一時間咩人生希望都冇晒，慘絕人寰。好彩另一個被殺同學嘅家長出手相助，幫佢安咗枝機關槍義肢，於是佢就以打死罷就嘅決心殺盡一眾黑幫高手。比起《Planet Terror》，《The Machine Girl》嘅budget無疑少得可憐，特技方面亦拿西得多，比較近似《鐵男》嗰類刀仔据大廈嘅日式indie gore。不過正如《鐵男》嘅塚本晉也一樣，導演井口昇表現出日本主流電影少見嘅強勁爆炸力，而且騎呢嘅血腥位拍埋《Planet Terror》亦絕唔失禮。淨係嗰個鑲咗電鑽Bra嘅女壞蛋就已經睇到我爆晒血管 ---- 見佢一嘢攬實女主角起勢「榨汁」，不禁令人諗起當年《鐵男》電鑽何B仔嘅震憾！女主角手臂被監生炸成天婦羅嗰場，亦係睇到人Wee嘩鬼叫嘅經典。至於另一場講個壽司師傅被黑幫切手指，然後整成一舊舊壽司屈佢自己品嚐，就更加係見都未見過嘅一流絕橋！導演井口昇簡直係一個「紅筆小新」，企圖用一支紅色蠟筆就狠狠填滿每格菲林。

水手服與機關槍
如果睇返日本cult片系譜，呢套嘢其實有啲似當年藥師丸博子主演嗰套經典《水手服與機關槍》---- 同樣係一個頓成孤兒嘅高中生，一樣係一個妹揸機槍力掃黑幫（當然，Machine Girl係「安咗支槍」，唔係揸槍），而且大家都係玩誇張另類嘅瘋狂情節；不過比起《水》片，《The Machine Girl》嘅設定又要更加天馬行空。好似片中嘅黑幫就被設定為武林世家，旗下更有大量現代忍者，於是全片就乘機製造大量肚破腸流、血如泉噴嘅刀槍對戰。導演甚至加入血滴子、電鋸呢啲cult友必buy嘅道具，令全片更添型格cult味。當然，齋睇一個可愛女生著住水手服、孭個書包仔，咬牙切齒將個忍者射到髏骷骨都現埋，相信任何film geek都覺得對得住荷包有餘。雖然套戲8月先喺日本上映，香港就算會上都肯定有排等，不過DVD嚟緊6月已經喺Amazon有售，我係你就老虎同蟹都買嘞。


（同場加映）打波先嚟落雨系列之：God Bless《G.I.Joe》

(Snake Eyes, Duke, Storm Shadow and The Baroness, Hawk, Ripcord, Scarlet, Cover Girl)

正所謂：「打波先嚟落雨，唔通連個天都唔鍾意我？」有時睇住一套套你期待嘅作品畀荷里活一手糟蹋，難免覺得個天真係悉心虧待你。好似上幾期筆者挖到首批《G.I.Joe》劇照，眼見Snake Eyes造型相當像樣，以為扑碎舊心頭大石啦；點知早兩日再有大量劇照流出，先發現成件事原來相當瀨嘢。Snake Eyes下半身嗰條爆娘軍褲我都唔同佢計喇，問題係Duke、Scarlet嗰啲一線角色個個著到《Metal Gear》咁款，完全冇晒《G.I.Joe》嗰種顏色鮮豔嘅原作風格！最離譜係Storm Shadow，連忍者面罩都冇埋，真係阿媽都認佢唔到！我諗有關方面應該係參考06年嗰套日本Gonzo畫嘅《G.I.Joe：Sigma Six》動畫，搞出呢批懶update嘅造型迎合新一代fan屎。要知道《G.I.Joe》最大嘅fan base始終係我哋呢班睇80年代卡通版嘅老鬼，得罪我哋，究竟套戲係咪仆唔切呢？

（原文載於《Milk》#353 "School Of Cult"專欄）