Happy Birthday To Me!

過咗一個不可思議嘅晚上！

話說拍拖咁耐，內子不下十次八次講過想幫我搞生日會。奈何我對birthday party呢家嘢已經唔太熱衷（咁嘅年紀依然一事無成，支香檳真係開唔落……），加上近年交際冷感，同好多老友都變得冇乜兩句，監硬要班friend賀壽似乎大家都辛苦（咁講係誇啲，不過你明我意思啦）。而且my idea of having a good time不外乎7、8兜友去卡拉OK劈酒、唱beyond、爆粗、講心事、「玩圍jark* 」…… 呢啲痳甩嘢唔係人人可以奉陪，我更加唔想圍jark起上嚟老婆有乜損傷。

Anyways， 內子一副胸有成竹嘅模樣，決意今年幫我搞個麥當奴生日會，仲指明要來賓玩著校服！老麥同校服我都好OK；不過大家幾廿歲人，我實在唔覺得我啲friend會就犯。何況今次仲係同鼻少、月巴氏一齊慶生，要喺friend嘅friend面前出洋相，以我班朋友嘅性格更加睬你有味。見內子同鼻嫂、家琪等搞手鬼咁興奮，我當初只係一心play along。點知隨住日子愈嚟愈近（9/14），件事好似愈搞愈似樣：陸續收到風有人摷/班/買校服，而且參加人數亦愈嚟愈多！到我兩公婆約鼻氏伉麗出嚟傾細節嘅時候，我明/暗啞底其實已經好lun期待。當然，喺暗啞嗰一底，我亦擔心我好多friend最後會放9我飛機……

結果，到咗14號當晚，尖東老麥出現咗一個令我畢生難忘嘅奇景！正確嚟講，係出現咗好lun多非小蒙恬所能形容嘅奇景。以下大家見到嘅只係冰山一角：

奇景01：當初邀請好友尼氏出席，此君曾有過「唔係搞啲咁嘢下話？」嘅反應。點知條友不單止full gear赴會，一坐低仲表演一場行為藝術 ----《學生哥老麥揾書》，交戲度200%！圖中鼻少手持嘅正係尼氏終極媾女武器……多功能神奇筆盒！現場所見，女同學無不分泌失調。話時話，我同尼氏中學同窗多年，真係冇lun見過佢著校服咁靚仔。

奇景02: 另一位學界最具衣著品味獎得主 ---- Joe記（左一）。評判短評：呢位師兄啲Phy、Chem似乎好掂。

奇景03: 全場總冠軍 ---- Stanley。評判短評：冇嘢好講，佢唔羸我切乜都得！

 聖育强中學特別獎：Cynthia。

奇景04: 當晚三位壽頭：小弟（左一）、月巴（左三）、鼻（左四）。左二為當晚招呼我哋嘅靚姐姐（真人掂過上鏡好多）。至於個奇景，係我見到佢收工竟然換番校服！

奇景05: 我以為凑到卅人嚟已經偷笑，點知據內子统計前後應該有40幾人出席，而且著校服嘅起碼有一半！好lun感動！

奇景06: Either劉國昌開拍《童黨3》，or 杜Sir 開緊 《放逐2之放學》……

奇景07: 我好相信我哋係全香港第一個喺呢度影班相……

超多謝大會主辦單位：鼻嫂Doca（左）、內子Karol（右）以及家琪！當然亦爆感激所有到場嘅朋友，特別係著校服嘅各位。我真係好耐冇試過咁lun盡興！多謝畀面！

老婆，呢鑊嘢我真係唔識報答你。我想話他朝我飛黃騰達，同你響Four Seasons再咁樣擺酒……不過即使我真係發咗，唔著婚紗你掣唔掣先？

P.S.: 查實22號至係我正日，歡迎各方好友相約再聚。

圍jark* ：男拔傳统暴力遊戲。玩家（一般五至十幾廿人不等）以「黑白」決定一名受害者，然後其他仆街先將其制服於地上，再逐一飛jark而上，形成人肉層層叠；冧咗再jark，jark完又冧，直至有搞出人命先兆為止。有經驗嘅受害者會喺第一件jark上嚟之前以曲膝、起踭自保，以防傷及胸肺。jark人高手則可以叠成5至6層人塔仍維持不倒，堪稱奇技。又，有學者認為食得最應嘅並唔係最底嘅受害者，而係第二層（即第一個jark上去嗰個）；然而箇中原因仍有代調查。（注意：圍jark係冇得學嘅，on 9仔切忌模仿，否則後果自負。）