背景： 要追溯筆者對《The Stuff》嘅甜美回憶，先要提起一段咸咸哋嘅童年往事……。話說小學時代筆者讀嘅係全日制男校，偏偏成班痳甩仔嘅心智發展又遠超《早熟》裡頭嘅房祖明；喺缺乏任何Fiona滋潤嘅情況底下，荷爾蒙上腦自然在所難免。雖然一眾飢渴小禽獸已經異常好學，奈何當年一個小學生能夠涉獵嘅「性知識」實在少得可憐；對於我哋呢類小朋友嚟講，香港直頭係「情色文化沙漠」。唯一令我哋有一絲希望嘅，只係逢星期五11點半打後明珠台嘅"Night Heat"時段（中文譯名叫「夜激情」）。可能嗰陣香港人比較早瞓，夜晚11點幾已經少睇電視，電視台唯有推出疑似「有嘢睇」嘅電影精選，期望吸納一啲「另類觀眾」。記得打響頭炮嘅，係早期外語三級片《碧麗沙的情人》（《Bizarre》）：由於部戲上正場時已經頗為轟動，加上明珠台事前又勁做宣傳，搞到我同一班同學不知幾鬼期待。可惜，大家「冒住生命危險」、背住屋企人捱更抵夜，到頭來只係睇到一個畀電視台剪到九彩嘅「欠點」版本！大人世界嘅「爾詐我虞」，一班小學生終於深深體會……。不過，由於女主角Florence Guerin實在索得離譜，令我哋對"Night Heat"嘅下一炮又暗暗期待。如是者，喺無數個偷偷摸摸嘅星期五晚上，唔知有幾多小朋友好似我哋一樣，糊里糊塗睇咗好多8、90年代嘅經典情色片，包括《野蘭花》（《Wild Orchid》）啦、《 綑著我! 綁著我!》（《Tie Me Up! Tie Me Down!》）啦……當然，啲戲一樣係乜都剪晒啦。
When "Night Heat" Loses Its Heat 雖然明知係吊癮版本，但對（口靚）仔嚟講有得吊癮始終好過冇癮。所以每當"Night Heat"嗰個影住一團團火嘅片頭一出，嗰段充滿罪惡感嘅sound track一奏，一班細路依然好似引蛇出洞一樣，無聲無息鼠出廳開電視。問題係日子耐咗，唔知係咪情慾片嘅存貨播得七七八八，搞到"Night Heat"開始夾雜一啲九唔搭八嘅電影。呢啲騎呢戲幾乎咩類型都有，當中包括今次要講嘅《The Stuff》。執導嘅係B片老手Larry Cohen，佢嘅近期嘅作品有《Phone Booth》（來電險事），同拍得麻麻嘅《Captivity》（禁室情狼）。有睇《Phone Booth》嘅朋友，應該領教過呢條友以慳家為原則嘅電影風格（全套戲幾乎係靠一個電話亭嘅主景撐足全場）。打從成名作《It's Alive》開始，佢拍嘅恐怖、驚慄片通常都以concept食糊，特技往往比較疏落；弊在條友嘅導演手法又相當粗糙，所以雖然好多cult友覺得佢好有諗頭，一般嚟講我對佢都興趣不大。不過《The Stuff》卻係不得不提嘅例外。
《The Stuff》：Are You Eating It...Or Is It Eating You? 首先部戲嘅大橋已經夠晒原創 ---- 一班礦工發現由地底湧出嚟嘅乳酪狀物體，一試之下覺得美味非常，於是話咁快就將佢入桶包裝，大批大批於市面出售；喺鋪天蓋地嘅宣傳底下，呢隻名為"The Stuff"嘅嘢迅速打低傳統雪糕，成為當時得令嘅甜品新貴。事情當然冇咁簡單啦 ---- "The Stuff"唔止會令人食到上癮，甚至可以一日三餐樂此不疲……而且不論競爭對手點樣化驗研究，始終解唔開佢嘅成份秘密。商業間諜Rutherford受僱於敵對嘅食品公司，調查"The Stuff"背後嘅成功配方；點知佢一查之下竟然發現駭人真相 ---- 原來"The Stuff"並唔係咩天然食品，而係不知明嘅異形生物！一旦食咗落肚，呢種異形雪糕就會操控思想，並且反過嚟將宿主嘅內臟慢慢食到一乾二淨！於是Rutherford伙同原本幫"The Stuff"搞宣傳嘅廣告公司女老闆、一個畀"The Stuff"搞到雞毛鴨血嘅曲奇大王，以及一個目擊"The Stuff"喺雪櫃入面躝躝嘅（口靚）仔，一齊殺入食品工廠消滅異形……。
狐狸姑姐 2008-09-11 11:14