升乜鬼吖！

人年紀愈大，要求嘅嘢會比年輕時有所唔同。

我唔知道，响呢Ｄ志願組織入面，「升職」會代表Ｄ乜嘢。

由 AM 至 CPL，再由 CPL 至 SGT，老實講我唔係好睇出有乜大分別。

又唔係升咗有錢收。

有嘅只係响隊嘅行政上，我係有權去命令下屬去執行我合法嘅指令。

但係，做咗七年 NCO，我絕少用「命令」嘅方式。

我鐘意「拍膊頭」去做。因為我覺得，大家都係兄弟。

更何況，現今真正嘅紀律部隊文化都唔係太興「命令」呢種玩法，都要講求上下溝通、team working。

唯獨係响呢Ｄ「四不像」裹面，居然仲有小部份人玩「紀律」、玩「真軍」(均真)。

而家响得隊入面嘅老鬼，大家都係為咗一份感情而留低、去付出。

尤其係近幾年嚟，requested duty 嘅性質同埋數量都令很多兄弟都疲於奔命。

加上愈嚟愈少後生仔肯入隊、肯入嘅都轉頭就走，一直支撑住嘅，就只有一班老鬼。

記得十幾年前，大家都正值年青之時、有些兄弟仲讀緊書。

而家大多都已成家立室、有兒有女；有些則營營役役，假日都要為口奔馳......

但在召喚下，就算他們的付出比年輕時少得多，仍樂於接受。

當然，隨傳隨到的卻係少之又少。畢竟在而家嘅人生中，有好多嘢都比當值來得重要。

呢個星期日大操，又有兩個兄弟攞 pan pan 啦！恭喜馬夫同埋石頭先！

本嚟係值得高興嘅，但係......

......我真係好唔明點解之前一日要去 set 場，嗰一日又要我哋操、又要我哋做場中嘅 FA ...... 完咗之後仲要做兩個 duties......？

香港島莫非只有我哋一隊？

如果有人覺得，兄弟肯「多勞」佢就會「多得」的話，對唔住，我覺得我而家已經足夠。

如果你依然相信「多勞多得」的話，咁我哋Ｄ老鬼請你幫幫忙，做埋我哋十九幾人嗰份。到時上大人見到你一兩條友可以做十九幾人Ｄ嘢咁 sharp 醒，話唔定即刻响大操眾人面前升你做 AC 都唔定呀！呵呵！