聖誕新年禮物日

從來一到新年聖誕，小弟就如面臨快樂大敵。
先來結婚周年，再有小師妹生日，做冬聖誕新年，環環緊扣，喜慶事共治一爐，即使破財也是無可奈何，笑著面對，當然荷包肝硬化也是必然結果，但錢搵得來就預咗洗得去，志在達到心理平衡，為博紅顏一笑，也可算是人生快慰。



花心思，搞佈置，為節目添情意。
還記得上年的25日聖誕節，正是深井新居入伙之日，那年倉促進駐，沒有時間好好佈置，今年特意放假，就來花點心思。
先買樹，後掛燈，再買松果，Jungle Bell，最後鈎上一對白雪人，唔講都覺自己故作浪漫，而三周年紀念日，加上一支香檳玫瑰，這個Setting也算是呃得下人。




有氣氛，無禮物，總係唔夠開心。
所以小師妹生日，定要有蛋糕押陣，再來個水貨電話，正當人人愛上Iphone之際，小師妹還是依舊只要打出打入，還投訴：「唔該你，唔好再襟電話啦吓!」，甚麼黑莓，面書功能，她都認為是壞機主因，所以她一直都是Sharp的支持者，咁又係，勝在顏色正，個芒靚，今次將Sharp的水貨入手，只怪香港代理數碼通再無入貨吧。



而結婚周年禮物，就梗係以共用為大原則，將平日唔捨得買的家用產品入手，先來Nespresso的得獎咖啡機。(無錯，我睇晒選擇的試用報告，這個是最抵買的，仲要係瑞士製造，扮晒有型)



再來Kohler的360度無定向花灑。(哈哈，不是無定向，而是四個方向都有不同出水效果，唔講都知，換置花灑，是一種夫妻的另類溫馨)
小師妹從不愛名牌，結果今次12月血拼禮物周，在有限預算下，受惠的不止是她，真的是普天同慶，人人有份，唯獨家中小貓，唔知他有無發覺原來份份禮物都無佢份呢?
唔知幾時開始，聖誕新年，香港人都愛禮物。