和平分手

我家工人姐姐嚟咗都成3個幾月，表現一般啦！要讚嗰啲之前都喺度講過啦......佢竟然突然話會辭職喎！咁佢最近工作表現係跌咗少少既，唔計唔關櫃門忘記帶鎖匙嗰啲濕碎野，仲有啲啲事件發生過例如︰

1. 試過遲咗落樓，校車走咗.............嚇到豬桐依家寧願唔食飯都 puk落街等校車！

2. 前個禮拜二︰唔記得7:00pm豬桐要學琴(琴姐姐上門)，姐姐嚟嗰時佢同豬桐除哂衫準備沖涼！搞到豬媽餵緊奶都要走出去開門！唉，但跟住上個week佢都係唔記得！(喂大姐你嚟咗3個月，個個禮拜豬桐都係呢個時候學琴架啦，你冇理由唔記得架...)

3.  經常豬桐做緊功課練緊琴時揾佢傾計 / 玩 / 幫佢做野！有次豬桐學緊琴時有電話嚟，佢唔去接聽結果又係豬桐走去聽電話！(咁啱嗰次就係豬媽打返屋企揾姐姐，所以斷正！)

4. 一係叫豬桐去應門(但豬桐唔夠高望門眼，所以係唔係都要打開門) ，一係佢開咗門但發現唔識啲人又唔嚟書房揾我，只係呆企....又唔問乜事.....................

5. 一離開廚房有人按鐘都完全唔會知(個鐘係裝喺廚房度)，又係豬媽去應門！

6. 今日佢煑緊午餐，豬桐入咗廚房兩次..開雪櫃及dum垃圾，佢完全唔知 .......警覺性低咗啲喎！最慘係佢把菜刀間中仍會就咁擺枱面....若果豬桐一吓唔小心摸咗落去...............唉豬媽唔敢諗咯！

7. 日日提佢開冷氣要關窗，結果佢係有關客廳窗，但因為冇講房窗都要關所以冇關到...........................

8. 貼咗中英對照既通告成個禮拜話星期五洗水缸要停水，豬媽亦提過佢！結果佢唔記得..........一滴水都冇儲起，仲走去買哂餸！唉好彩亞仔食人奶啫，如果唔係連奶粉都開唔到ar！

9. 屋企夠竟有幾多把縮骨遮都未知.........

10. 仲未分到豬桐啲去街衫同埋屋企衫放邊度..................

講住咁多先，雖則佢係咁，但豬媽都未諗過要換人，因為佢本質唔壞，唔會"傷害"啲細路。豬媽有哂心理準備當佢係人肉吸塵機 (佢做清潔一流架)，又當自已係佢秘書囉！

點知....................

人算不如天算，昨日豬媽竟然被通知，佢會最快明年一月最遲三會辭職喎，佢話佢都係想做返工廠，佢會返台灣 (嚟豬媽度之前佢喺台灣做工廠架)，仲話嗰邊個leader已經答應留個位比佢！所以佢喺香港做到還哂錢就會去台灣喎...........

咁豬媽問佢喺香港唔開心咩??? 姐姐就話佢唔習慣成日比人"提"住做野，愈"提"愈錯喎....同埋佢唔鍾意同人講野，唔鍾意去街，只係鍾意留喺室內(屋企)裡面做野.....但偏偏豬媽超多野講，豬桐超多野學............

豬媽心諗.......................

唉講真你唔錯豬媽又使乜提你吖，提你一次你記得豬媽又唔使咁長氣啦！而且你嚟咗3個月啫，你都冇可能一吓子記得哂跟得好所有野！咁有野唔啱豬媽梗要出聲架啦！你咁講莫非有錯有唔啱既野都唔出得聲????

唉，昨日我地係坦誠對話，中間並冇針對又冇唔開心！豬媽唯有祝福佢揾到自已想行既路，同埋承諾佢想走之前唔會炒佢！等佢安心賺夠去還錢..........豬媽自問算係咁啦！係咪???