死忙..........

豬媽不嬲唔會限制豬桐諗乜講乜...咩都可以問...咩都會答。但今日..........扎緊頭髮返學時.....

豬桐︰媽咪若果你死咗我咪要照顧細佬囉??

豬媽︰吓?? (不以為意)

豬桐︰(即刻轉軚)我即係話你第時好老嗰時呀！你死咗咁我點呀? (C啦豬媽一向同豬桐講自已有61歲，咁佢係咪以為我好老仲好快會C呢)

豬媽︰咁ar，若果你有能力照顧細佬你咪幫我照顧佢囉，但可能細佬都好叻唔使你照顧呢！

豬桐︰我會好掛住你架，你記住喺天堂等我喎！

豬媽︰好呀！ 我實等你..但你唔使急我實會等你架，你唔使咁快上嚟揾我喎！

豬桐︰咁我祈禱時你記住要聽電話喎！(豬桐學校教小朋友畫十字聖號=打電話比天主祈禱...)

豬媽︰好呀，我會聽架！(但豬媽其實唔多想再咁深入傾落去...............)

豬桐︰咁若果你都掛住我，你個靈魂就返嚟揾吓我啦！

豬媽︰吓，你又話好驚靈魂既? 咁你會唔會又驚咗我架??

豬桐︰唔會，因為有細佬喺度吖馬！

豬媽︰但可能細佬都驚靈魂架喎................

豬桐︰唔會，佢係男仔，男仔唔會驚架！(到此豬媽選擇唔答啦.....)

***********************************************************************

可能呢排清明啦，99同62去拜完太嫲返嚟，猛話太嫲又化身一隻蝴蝶在墳頭飛舞啦！(但99屋企每有大事發生，包括豬爸大婚、豬媽陀BB....的而且確梗會出見蝴蝶架喎) 加上豬桐不嬲都成日話見到靈魂...................唉佢一定諗多咗好多野喇！

但今次佢咁樣講一講，豬媽都好驚.............因為生仔都真係揾命搏架喎！若果豬媽今次有咩事，真係會放唔低豬桐...........................成個下午都比豬桐搞到囉囉攣添.....................好傷感..