婚禮進度 update (1)

十月十六日 (星期四)

今日 confirm 了結婚証書冊 ($155) 的款式，我哋仲加了 $100 ，用金色繡線上我哋的名同埋 big day 的日期，之後就即刻過了數比 Your Wedding Memory，而家要等到 16/11 先有得拎制成品，好急心想快 d 拎啦 ~

十月十八日 (星期日)

今日一早，老公仔就同佢的父母一齊過去我哋的新居參觀，順便搬咗好多衫同書過去，然後就係新居樓下等我同我的父母，一齊出去佐敦的聯邦金閣飲菜，因為我哋今日約了蘇經理傾埋 big day 當晚的菜單~

我哋一行六人，大約 12:30pm 就到達了，不過由於係 lunch time，所以要等 2 張枱，但蘇經理好好人，叫 d waiter 將 d 細枱加大比我哋 (因為當時 2-4人枱仲幾張，但 5-8人枱就無了)~

大約飲到 2:30pm 到，就食飽飽了，而蘇經理亦都開始得閒，咁我哋就一齊傾埋 big day 當晚的菜單，同埋當晚的流程等等~

大約傾到 3:30pm 就 confirm 好晒 d 嘢，蘇經理仲好好人，教咗我哋好多嘢，例如當晚的安排、走位、仲有多謝賓客的說話等等......

之後我哋就埋單，呢餐食咗成 $500 呀，都唔係叫了好多嘢咋，真係有 d 貴啦 ~

根住我父母就話去行下街街先，而我哋就同老公仔的父母去了龍將洋服做西裝比未來老爺~

去到龍將洋服的時侯，都幾多人下，師傅叫我哋係外面等 10 分鐘，過咗一陣就輪到我哋入去揀布料，師傅拎了幾種價錢的布料出來比我哋揀，最後揀了一款厚身少少的布料 ($1680)。

之後師傅就同未來老爺度身，而我就同未來奶奶係外面傾下過大禮要買的物品。

度完身之後，師傅好有自信咁同我哋講，佢度身做的西裝，從來唔需要改的，如果要改就真係難過中六合彩云云，都唔知係唔係真嘅~

做完西裝後，未來老爺同未來奶奶就回家，而我哋就去了 Loving U 度 Final Fit 我件婚紗~

點知度度下身的時候，Loving U 的老闆娘同我講，我個 gridle 好似唔係好岩身，就算佢同我修窄個腰位，個 cup 位都唔得靚，佢提議我去買個另一個 girdle 先再返來度多一次身。所以我哋就即刻搭車去金都，去返平時買 bra 果間 shop 睇下有無岩我身的 girdle 賣~

去到金都之後，我哋即刻上去果間賣 bra 的 shop，今日好多人呀，要等成 5 分鐘先入到去，根住老闆娘就拎了一個比我試，一試上身，睇到好明顯的分別，呢個 girdle 好貼身，個 cup 位完全無走位，所以就即時買埋啦 ~

舊嘅呢個 girdle 係响元朗果間租衫公司買的，當時試身的時候都有 d 走位的，但果間公司的人又話係咁，著埋婚紗 / 晚裝之後就唔會有咁的現象。我果時唔知道，以為真係咁，而且又唔知邊度有大 size 的 girdle 賣，所以就買了。估唔到佢哋會呃，佢哋咁樣的做生意手法真係唔岩啦!!!

其實我而家都有少少擔心，big day 當日的化妝的 (我都係 join 了呢間租衫公司的化妝 package)，近排睇返當日的試妝相，同幾輯婚紗相比較，我真係覺得佢哋個化妝小姐的手勢麻麻，同埋化得唔係咁靚。

老公仔就提議，上網搵定 d reference 的髮型比佢睇，同埋到時比埋 d 婚紗相的妝比佢照住來幫我化妝，希望個效果可以好 d 啦~

買完 girdle 之後，我哋就去了租褂果間公司買 6 個中式襟花(新郎、新娘同 4 個主婚人)，之前就返了新居執嘢~