08.25

      824,生日，咁又老咗一歲。
      咿年嘅生日，係過得最有意義最感動嘅生日。916，開始咗喺新學校嘅爲期8日半嘅軍訓生活，生日嗰日，咁啱係軍訓嘅結營儀式，一早起身，就已經收到Pakky嘅“生日快樂”，然後一句句“生日快樂”陸續而來，甚至有d唔係我哋宿舍，并唔係好熟嘅同學都走嚟同我講生日快樂，好開心，聽到d祝福嗰陣，我都唔知道應該點樣答，隻係一味識得答多謝多謝。我生日啊時都係喺暑假，從來未試過咁多同學當面給予我祝福，所以真係好開心。然後結營儀式結束后，我哋成班同教官閤照，之後教官帶隊離開田徑場嘅時候，全班一齊唱生日歌，of course，唔單單唱我俾我听嘅，因爲潘欣琪同我同一日生日。不過真係好感動好感動。返宿舍嘅路上，好多以前嘅同學都同我講happy birthday，然後返到宿舍，一打開手機就收到好多message，全部都係祝福嘅message，真係好開心好感動，有咁多人記得我嘅生日。中午去咗飲茶，收到好多利是，咿個family day係我過得最開心嘅一次，哈。期間，收到阿瓜同奀奀嘅電話，仲分別同佢哋傾咗好耐，可憐我d電話費，喺香港打過嚟要收國際長途gar……不過佢哋兩個抵贊嘅係够誠意，咁貴電話費都打俾我～其他人雖然冇打電話，但都有send message過我，其實已經好開心嘅啦我。特別死人Suga，條message寫住“電話費貴啊，就唔打電話俾你啦”，哼，虧我對佢咁好……不過，今年嘅生日，真係真係真係好感動。
      下午同陸泳去睇電影，本來打算睇返Kenny部戲，《荒村客棧》，點知我哋去嗰間戲院竟然冇得睇！！！大陸硬係落後d嘅，激到我哋死～
      晚黑收到k嘅電話。只可以話好尷尬。
      生日快樂。
      嗯，多謝。
      兩句之後，係死寂嘅沉默。然後k開始發話。
      今年生日過得點？
      好感動，全班人唱生日歌。
      咁就半年了哦。
      嗯。
      我听autie講你考咗間好學校喎。恭喜你。
      嗯，多謝。
      半年，我唸咗好多嘢。
      係啊，人識得思考會變得成熟。
      我哋之間真係變咗好多。
      嗯。
      一年前，呵，原來真係好辛苦。特別係無法知道咿個等待有冇結果。
      你自己摞苦嚟辛，呵。
      我講過嘅都會做到，I believe myself。
      我會變gar。以後嘅我未必係咿家嘅我。
      我知道。
      咁你……
      我成日覺得你份人唔變，我問阿瓜覺唔覺得你份人咁多年都唔變，阿瓜話，唔係啊嘛，變化好大喎，份人識唸嘢好多啦。呵，佢d語氣真係好驚奇，好好笑。你啱啱米話，人識得思考會變得成熟嘅？我覺得仲會變聰明。我會覺得你冇變，我唸，唔係因爲你冇變，係因爲無論你點變，我都會爲咗你而改變。呵，好silly啊ho。
      好感動听到有人爲我改變，嗯，真嘅，多謝你。但今日唔知聽日事，話唔定邊一日我變到你無法再爲我改變咧？呵。
      sorry，一早，我就唔應該應承我mummy返香港。唔係都唔搞到咿家咁狼狽。
      你冇必要say sorry啊，係我明明冇能力却信口開河話要等。
      就算你唔信口開河，我都會等。
      呵，多謝。
      夜啦都，去休息啦你。
      嗯，bye bye。
      bye bye。
      半年前，我叫過k唔好打電話俾我，我話我要專心準備考試。半年之后，聽到k把聲，嗰种不變嘅溫度依然，但却倍感生疏。變化萬千，瞬息萬變。由細個啊時日日o黐埋一齊，到大家都要幼稚園開始分開，再到我11歲啊年佢返翻香港，再到咿家，過咗4年冇佢嘅生活。感情不斷蒸騰、變味，關係不斷更變、惡化。我承認我係一個冇耐性嘅人，我經唔起漫漫嘅等待，一年又一年。所謂時間可以沖淡一切，就算刻意去銘記，時間就係時間，始終係强大嘅一方，3年嘅沖刷，乜都淡了。人係自私嘅，係我話唔想再等，因爲我係個喜歡半途而廢嘅人，由細到大都係咁，3分鐘熱度。無法想像，我竟然維持3年嘅熱度。世界會變，何况我只不過係個小人物。“你唔等，但我會繼續等”，本來係感性嘅言語，但我無法感動。可能造成如斯田地，有太多太多錯誤嘅因素，而我就係最龐大嘅因素。如果當初我唔講話要等待，如果后嚟我堅持等待，一切或者都完全唔同。起碼，唔似咿家咁，尷尬萬分。阿瓜話，正因爲兩個都放唔低對方先會咁。唔知咧，或者啦，我乜都唔想知，我隻係想好好咁學習，快快樂樂咁過正常人嘅生活，我唔想貪心，都唔敢貪心。
      加油啦，羅偲昀，我需要做出自己嘅成績，我對得住自己，對得住關心我嘅人。