台灣婚紗照之吃喝篇

今次台灣之旅只得四日三夜, 扣除揀衫, 影相, 揀相嘅時間, 淨落黎嘅時間唔多.  不過, 因為我地之前去過台北, d歷史文物景點都去過, 所以今次主要係食下野周圍行下咁.  跟住d旅遊書&朋友推薦嘅食店, 真係好唔錯呀!

呢間長兵衛, 晌酒店嘅對面, 非常方便.  係我地第一晚試完衫後, 貪方便咁走入去食.  不過一試難忘, 好正宗嘅日式野食, 好好食呀!  估唔到晌台灣可以食倒咁正嘅日本野, 好驚喜呀!

之後, 都係日本野, 亦係酒店附近嘅.  我估因為我地住嘅區域有好多日本人住, 附近大部分都係日本食肆.  呢間叫肥前屋, 好出名架, 聽講長期要排隊忝, 不過好彩我地住得近, 早在少少去等開門, 咁橋佢又早在開門, 最後唔洗等.  佢地最出名係鰻魚同蛋卷, 都幾好食嘅. 

一向都鍾意食上海野, 點會放過小籠包丫.  今次無揀到鼎泰豐, 反而試在旅遊書嘅另一推薦 - 金品茶樓.  呢間金品茶樓係老店, 得一間咁大把, 仲要都幾近我地住嘅區段, 即管去試下.  唔好以為"金品茶樓"個名好老土, 裡面裝修好新好靚, 最搞笑係佢地竟然係播英文歌, 一邊飲茶一邊聽歌又幾好feel呀.  呢度樣樣野都好好食, 又唔洗排隊, 正呀!

再來係必食嘅度小月, 入到去好似大部分係香港人, 充斥住好多廣東話呀.  d野食又真係唔錯, 不過就細碟少少, 價錢都ok呀!

最後係臨上機前去嘅甜品屋, 專食朱古力架.  裝修好靚, 粉藍&白色加水晶燈, 樓底又高, 晌度下午茶真係好舒服.  如果成日都有機會可以晌d咁正嘅環境下食high tea, hea下就好喇....