Summary

自從我地成家人一行15人陪老豆番潮州之後，個人就變得極度懶散，直頭去到虛度光陰既地步。日日就有如無線既風爭咁，晚晚萬無目的，唔係上網就打機，荒廢政事，連宮心計都冇追，由得馬將軍獨攬大權，任由d時間流走，~~~~~~但係........個人又幾開心喎！

首先，要推介一下11月遊戲之星........Forza 3！

呢隻唔係普通賽車game，而係集賽車、藝術、格鬥同埋講粗口於一身既game！賽車+藝術，驟耳以為係功夫+足球，其實係個game可以自己design拉花玩設計，亦可以上網用賽車積分去買都得！以我咁咩既性格，我當然係買啦！用唔現實既積分，去換取人地現實既青春嗎！幾著數呀！睇完你都話巧奪天工呀！

最正就係個game可以上網同8個friend一齊比賽！而又咁好彩，我響玩具網識左班西人，佢地可以得閒到晚晚蒲頭，而又晚晚都係玩呢隻game！加上佢地又係中坑，任D唔嬲，即使撞車撞到崩崩聲，自己晚晚嘈到媽媽聲，老婆響側邊一路上網一路眼超超，我都會當係減壓咁玩呢隻game！響呢個「姣婆遇上脂肪客」既情況下，好自然就晚晚荒廢朝野，冷落妃嬪~~~~

另外，當然亦有射爆頭既Call of Duty Modern Warfare 2啦！呢個game除左可以online 16個人一齊對疊互射之外，今集個故事非常有電影feel，而且仲好出人意表添！所以我係唔會講既！

上兩個星期咪好凍既，於是就去左黃大仙大成街街市買料打邊爐！需知道我家住牛頭角，加上本人懶惰性格，但係都要楂車去黃大仙買，就知道呢個街市幾猛料啦！

首先，佢d野堅平，尤其是海鮮！第二，佢人流多，貨物turn over大，所以食物新鮮！第三，街市大，貨種多，其他街市冇既佢有！第四，分類統一，買海鮮一邊、菜既一邊、肉既一邊，乾淨唔會亂，要搵野都易好多！

點解要介紹呢個街市呢？因為自上年起，佢多左一檔好特別既野賣，係生蠔，唔係普通生蠔，係要響街市排隊既即開流浮山生蠔，以為即開會好貴？no，一斤30-40蚊！大隻(男人手掌唔計手指咁大)有8-9隻，愛黎打邊爐簡直係冇L得頂！只要返屋企用大量生粉+筲箕洗到佢白雪雪，然後用冰+水浸住佢直至食為止，等佢收縮後，一食果時就有脆口冇渣既感覺！正！
ps.要買請早，星期六、日5:00pm就會賣哂！

至於我的好野方面，自上一篇出完之後(嘩！原來成兩個月0拿？) 小弟已經由三隻加到六隻，其實都只係添置左小小野0即~~~~仲要偷運走私先至入到境！點知上架第二日，屋企既小海關發現，即時爆響口俾大海關知，響夜晚當我洗碗時就俾大海關的左去問話，之後仲要守行為成個禮拜。尋晚見風聲冇咁緊，先至拎出黎滲線同痴貼紙咋！自己睇！

最後，就係個人表演！

好多謝咁多位看倌多年既支持，為左答謝大家，同埋希望閣下能有一個開心既愉快之旅，小弟即將為你演出一個你估唔到既節目！

可能你都曾經有試過，如果覺得我表演得好就拍下手掌啦！如果唔好都唔好her喎！

好....

預備...

我.....唏！

拜拜~~~~~~~