母親節

母親節同屋企大伙兒入咗大嶼山玩，係銀礦灣個沙灘見有燒烤爐，咁我地就黎個母親節ＢＢ蕉啦～～～我地仲係沙灘摸咗好多好多蜆仔添，如果退潮之後應該會摸到更大既蜆添，不過可惜已天黑啦，所以就收拾出發出城啦～～～

雖則剛剛燒完野食，但因為玩得好累，所以就係沙灘行返去碼頭既梅窩碼頭熟食中心既呢間怡軒海鮮美食食個晚飯，就係因為剛食都有點飽但又有啲餓，所以我地打算食少少野啫，咁見到個六人餐，可選六個餸喎，咁又見到有清蒸鮮魚喎，咁就叫啦，落單時佢又話呢個餐無蒸魚，咁又問佢咁呢個２８８蚊既二人餐有無蒸魚呀？佢又話有喎（真係奇怪，你做唔到既就唔好出餐牌丫嘛，都算）咁最後我地叫咗個四人餐，有四個餸，再叫多個二人餐（因為有魚嘛）。都係食啲平時既小菜，終於到條魚黎啦，媽媽一夾條魚，嘩～～～佢地居然係原條魚蒸，內臟乜都係度，個肚係一條刀痕都無架，咁就叫人黎啦，黎咗個阿叔，同佢講條魚未劏架喎，佢睇下條魚，佢用手，係呀佢一隻手攞住隻碟，一隻手伸手去條魚度拎走啲魚既內臟，仲話，唔係未劏呀，邊有呀，大佬呀，就算係你咁搞法唔係想拎走啲內臟放返上黎比我地食呀？個阿叔係咁好大聲咁理論，之後有個女既可能見我地太過激烈，走過黎叫佢拎返入去換過條比我地。我好清楚聽到入面既廚房佬講：好呀未劏丫嘛，咪比條劏晒既比佢地囉。（佢咁大聲都係想我地聽到既啫）好啦到條劏晒既魚黎到，見到佢個樣都唔討好架啦。我一夾個肚，你地睇下下面張相

啲魚肉係啡色架喎，你地食過啲咁既清蒸鮮魚未呀？我夾小小黎試，我叫個阿姐過黎問佢呢條係乜野魚，佢都望咗一望都要諗下先講呢條係桂花魚喎，咪玩啦，桂花魚係好滑架嘛，你呢條係乜魚呀？我地梗係嘈佢啦，第一次黎未劏既，我好清楚聽到你個廚房講比條劏晒既比我地丫嘛，（我家姐都話聽到），嬲到我呀，我即刻影底佢啦，大家千萬唔好去呢間野食呀，完全唔係做生意既，咩海鮮美食呀？咁都得既，個疑似老闆既人話唔收我地魚既錢，咁又點呀？我地走佢仲係度講下次再試過丫，我話仲試？無下之次啦你地咁做生意，無啲道德。我要搵晒任何途徑投訴佢呀，因為佢地實在太過份啦！

不過都無比呢間野掃到我地興既，呢啲係小事一樁，我地一家都玩得好開心～～嘻～