"出油"喇~北陸之旅(第三話)

九點鍾起身,第一件事就係量體溫.好在退咗燒,冇事喇~梳洗完食埋個早餐,又夠十點鍾要退房喇.擺低嚿行李喺酒店,起程!今日啲雪落得仲大...今日啲行程全部都係步行o架喎...今次啲行程已經因為落雪已遲咗半日,咁搞法好多地方都去唔到...

冒住狂風大雪,步行十分鍾去第一個景點.行到附近見到好多人去初詣.咦?!!乜裡面有寺院o既咩?原來個古城公園裡面係冇古老城堡o既,寺院就有一間...跟住啲人行咗一圈,然後走咗去買御守.等埋傻馬影埋相又起程去第二個景點.途中傻馬話想搵便利店取暖,因為對腳好凍喎...鬼咩~傻馬貪平買咗對最平o既雪鞋,一啲都唔保暖,梗係凍喇...奈何喺方圓幾百嘢都冇一間在左近,傻馬唯有頂硬上喇.

去完高岡大仏度影完相之後,繼續去第三個景點.順住條路一路影到去一個十字路口,傻馬經歷咗一次"人生交叉點"...睇睇個錶,十二點幾.繼續行去第四個景點,定係行返去駅食返個午餐暖下呢?兩條友企咗喺個路口度"食風"...傻魚頂唔順摷返個"儲備糧食"核桃芝士包出o黎,同傻馬一人一半.企咗差唔多十分鍾,傻馬終於決定行返駅食個晏先...至於第四個景點,今次只好放棄唔去喇...

新年度度都冇開,唯有返酒店間餐廳食.慢慢食完個晏,去埋個廁所又起行喇.穿過個駅去另一邊行十分鍾去第五個景點,瑞龍寺.啲雪越落越密,落落下又出一陣太陽,停分零鍾又再繼續狂落雪...喺呢個時候,右腳隻雪鞋竟然"肚餓"開始"食襪"喎...未去到瑞龍寺,右腳隻襪已經完全被"食"到去咗鞋頭.去到即刻搵個死角"嘔"返隻襪出o黎...真係好搞笑.影完相行返去駅途中,又o黎喇...今次係左右兩隻雪鞋都好"肚餓",都未行到一半就已經"食"鬼晒對襪...天寒地凍,唔搞住喇...一陣上到架車先至整喇.

返到駅,傻魚留喺待合室等傻馬返酒店攞行李.今日因為大雪o既關係,好多班特急都取消咗或遲咗好多至到.有啲仲唔知會遲幾多同幾點到,真係恐怖.好在普通電車依時運行啫.

三點四十九分班車,因為要讓路畀架遲咗o既特急,喺三點五十三分開出.去到金沢四點幾,可以去酒店攞房.攞緊房嗰陣咁啱奶奶打o黎問嘢,搞到傻魚亂晒陣腳唔知要做邊樣先好...掟咗個電話畀傻馬,攞咗間房先.之後同奶奶講埋個電話至上房.休息咗一陣又起程喇.諗住去兼六園影相,但係傻馬唔多願去影個"夜景"...咁算囉...喺附近行下算囉.結果個行程係遲咗一日,聽日要揀去邊添.

等傻馬喺駅附近影完相,然後行去搵便利店買零食,甜品同聽朝o既早餐.之後諗住去駅隔離個手信街行下,點知收晒工.望下個鍾,七點喇...去"醫肚"吧喇~去咗酒店對面個商場七樓食.等傻馬巡完後決定食乜,傻魚一路都冇比意見.

坐低之後傻馬又話有少少唔舒服...係咪呢?今朝扮乜鬼嘢大隻唔拉外套條拉鍊啫?!!如果唔係傻魚驚傻馬又再凍親,夾硬幫傻馬拉返條拉鍊o既話,傻馬可能已經發緊高燒!!!成日都係咁,唔肯聽人講...傻魚印象中好似見到傻馬個背囊裡面有兩粒感冒藥,叫傻馬摷出o黎食完飯食.仲有聽日,希望傻馬冇事喇...

天文台預測呢場大雪會落到聽日中午,希望唔會落足成日喇...冇車返唔到東京就弊喇~

(所有相片後補)