公心計

最近可能係ｄ人睇得電視多，個個都好似搞到自己係司Ｘ房ｄ女史咁，喺度摶出位，又勁擦鞋，鬆“月爭”、卸膊呢ｄ手段無日無之，簡直仲精彩過三色台嗰套電視連續劇。

小妹自己知自己事，正所謂“人才唔夠人出眾，說話唔及人玲瓏”，當然會閃埋一邊，默默耕耘就算。什麼做好事、說好話、存好心的“三好金句”，大家千其唔好跟隨，因為身處是非之地，好可能被人利用而好心做壞事架！

而小妹一直奉行“少說話、多做事；害人之心不可有、防人之心不可無”來行走江湖，事實上呢個忠旨比近期熱爆全城的“三好精神”強得多。但，呢個世界有人的地方就有是非同爭拗～～～正所謂：你雖不與人鬥，人卻偏要與你爭！

話說小妹有次小休，回到公司，卻發現在小妹小休期間要辦理的事情，仍然好似條咸魚咁“撻”咗係小妹張枱度，小妹覺得事有蹊蹺，於是走去問線人，線人戰戰兢兢咁稟報比小妹知，其實個條咸魚應該係小妹小休期間，有關人士就比咗野蠻太，按照慣例，野蠻太應該要即日處埋。只不過有人收件之後，嚟一招暗渡陳滄就想瞞天過海，轉個頭放喺小妹張枱度就想乜都唔使做咁囉。

聽到咁情況簡直佛都有火喇～～～小妹都只係一介凡人，仲未做到心如明鏡，當時真係怒從心中起，火向兩邊燒，於是乎就同野蠻太開火。野蠻太仲持住自己做得耐，仲想喺度辯駁，但比小妹一輪直斥其非，得理不撓人的態度嚇窒，眼見平時籍貫順德的小妹竟然識發火，野蠻太當場唔敢出聲。

阿野蠻太見勢色唔對，即刻收口兼黑面，可憐小妹一腔恕火剛剛燒起，但卻苦無對手，谷住谷住只會燒死自己，剛好手上有重要文件要呈比高層，高層見小妹神色有異，就問因何而異，小妹仲唔嗱嗱聲將心中鬱結吐之而後快咩～！

今次呢單嘢夾正天時、地利、人和，小妹唔出擊更待何時？怪只怪有人平時橫行無忌，不懂得些好意需回手的道理了。

電視台嗰套係宮心計，咁喺公司發生嗰ｄ應該叫公心計喇！