非常Ｃ９班主任之美少女代課老師

話説大肚婆班主任去咗放產假之後，o黎咗一個新o既代課老師。

呢個代課老師竟然係一個剛在外國大學畢業回港o既美少女喎！

人，緊係喜歡睇靚野o既～全班同學都對呢位美少女代課老師充滿好奇。（因為當時校中的老師真係好Ｃ９吓！）因此大家在美少女的堂精神都特別集中。當然，美少女老師的教學方式，跟素來只會依書直說的大肚婆班主任根本不可同日而語喇！所以大家ｄ成績都有少許進步。

好快，美少女就同我混得好熟。記得有一次，美少女同我講：「我聽日唔返學呀！」

「你做咩唔返學呀？有咩事呀？」

「我聽日去見工呀！」

要知道，代課老師根本就唔會成為正職老師，而美少女成為代課老師都係因為唔想賦閒在家。

「去邊度見呀？」好奇的我又問。

「去匯豐銀行見呀。」

「嘩～好喎！大公司喎！好野喇！見到咪唔做囉？係咪要第二個代課呀？」

「唔得架！講明要代到你地班主任返o黎架！你唔好話比人知喎！」

最後佢係冇去到匯豐做，佢好似話匯豐等人用，等唔到佢咁耐。

臨大肚婆班主任返o黎之前，我同幾個比較相熟o既同學約咗美少女出去玩。

陽光普照的星期天，我們相約在中環碼頭，計劃係坐船到長洲遊玩。

當日全部人都到齊，只差美少女。

佢終於都出現，而同佢一齊o黎o既就係佢男友，我地唔知點叫佢，最後就叫佢做阿蛇！（因為我地叫美少女做Miss，咁佢男友梗係叫阿蛇喇！）

阿蛇好好人，坐船其間不段同我地有說有笑，仲教我地一ｄ平時好少用o既英文。

終放都到咗長洲，食過午飯，無所事事，有同學提議踩單車。

當時我隻左手腕受咗傷，己經敷咗藥。

但……原來美少女係唔識踩單車架喎！

阿蛇提議，一個唔識踩單車，一個隻手受咗傷，不如租一架家庭裝單車，等佢照顧我地！（家庭單車係兩個人坐後面，前面又有兩個位，比一家四口坐架！）

我梗係反對喇，手腕受傷啫！對踩單車無礙喎！（唔係嘛！咁大個人坐o係小童座？）

o係我堅持下，最終梗係佢地自己兩個坐家庭車喇！

之後的歲月過得好快。眨眼，當日無憂無慮的小妹，就變成今天的我。

雖然我一直有美少女家裡的電話、地址，但從來都未試過聯絡佢。

不知道，到今天，她還好嗎？