盡責的郵差

星期六，唔知咩事，成個屋苑都冇電，重要由朝早９點半至下晝４點半。

因為通告一早收咗但就放埋一、二邊冇留心睇，淨係記得要停電！家中各人都早有安排，於是小妹星期五晚就做好準備，諗住一早起身搵定節目，免得停電其間留喺屋企咁唔安全！

正當小妹左滕右滕，搵定電筒，幫定 NDS 呀、MP３叉電，點知又比家姐窒頭窒勢：「你搞咁多嘢做乜呀？」

小妹繼續滕嚟滕去，邊行動邊解釋：「聽日停電喎～我梗無理由留喺度架嘛！咪整定 NDS 同 MP３，一早起身就收拾細軟去第二度 hea 囉！」

「你咪傻喇～人地係公眾地方冇電之嘛！關你咩事呀～你照樣可以開住冷氣瞓到黃朝八晏架！」對於５天半工作週嘅家姐嚟講，每次提到小妹星期六唔使返工，點都會顯得有少少酸溜溜！

「係真唔係架？咁我聽日唔咁早起身咯～有咩危險事發生先行樓梯落去囉！」小妹一向大懵，睇完通告都唔會記得內容，又見佢講到似層層咁，所以咪信佢囉！

點知…又比佢點咗！！！

星期六十點熱到醒咗，至發現冇咗冷氣，跟住 check 吓全屋，都冇晒電！小妹家係用數碼電話，因為冇電又唔用得，即係連對外通訊都斷埋！

好彩，手機仲有一格電，應該可以捱到４點半！

事到如今，唯有開晒全屋ｄ窗，攤喺梳化度打機同聽音樂、食乾糧為生囉！好彩係全幢大廈都無電，大家都冇得開冷氣，如果唔係ｄ熱氣由四方八面咁攻過嚟，想唔變焗桑拿都幾難！

正打機打得興高采烈之際，突然比一陣好輕微嘅敲門聲嚇親！由於聲音實在太輕～起初仲以為係自己心理作用，但聽真ｄ知道真係敲門聲仲驚！到底邊個會咁嘅時候嚟敲門呀？唔通係有咩事，管理員上嚟叫大家疏散？

嗱嗱聲走去打開一條小小門縫，門外漆黑一片，小妹見到一個非管理員嘅陌生男子棟咗喺門口：「咩．咩．咩事呀？」

「收掛號信呀！係咪有位ｘｘｘ呀？」身水身汗嘅郵差叔叔，用佢自己部手機當電筒咁照住封信！

「吓～有呀～停電都送掛號？唔好意思呀～真係唔好意思，麻煩晒你呀！」小妹真係覺得超唔好意思，但個郵差叔叔真係好好人，一ｄ都冇黑面，服務態度好好，仲安慰返轉頭：「唔緊要，呢ｄ機會真係千年難逢一潤架！」

雖然話送信係郵差嘅職責啫，但要人地爬樓梯爬成廿幾層樓喎！真係好難想像而家仲會有人盡責成咁架～簡直可以成為公務員典範呀！