慳得就慳

話說，上個星期，小妹收到外籍中高層ｘ先生秘書個長途電話。

「Simple，ｘ先生個太太一月會去香港購物，想問吓可唔可以住渡假屋喎。」

「吓～而家間渡假屋係外籍女士長住架喎！ｘ先生同佢太太住……咁好似唔係幾方便喎！」唔係見同阿秘書有幾句計傾，都費事睬佢！

「咁呀～我同ｘ先生傾傾先！我問完佢再打比你丫！你唔好問阿外籍女士住先喎！」

過咗一陣，ｘ先生個秘書又打電話嚟。

「喂～問咗喇～ｘ先生話佢自己唔去香港，只係ｘ太太同佢個女去咋！你去探吓口風，睇吓外籍女士肯唔肯比間“吉”房佢地住丫！」

我心諗，點探呀～我都係直接問好過！

我於是就走去問：「阿ｘ個太太同個女想話下個月嚟香港時住渡假屋喎～全部都係女生，ｘ先生講咗唔會嚟，咁樣會唔會唔方便呢？」

佢ＥＥ哦哦，又唔直接比答案我，我用疑惑嘅眼光望住佢。

「等我問吓先，係咪要盡快覆你呀？」

「係呀～等佢地訂酒店丫嘛～你知而家ｄ酒店都好 full 架喇！」心諗，千其唔好呀～咪又係要我幫佢地訂酒店囉！！！

到咗第二日，外籍女士同我講：「得喇～叫佢地嚟住喇～我比間吉房佢地住喇！」

我打電話比秘書，可惜佢放長假，於是我要直接搵ｘ先生。

「ｘ先生，你太太同個女係咪想一月頭嚟呢？」

「係呀～係呀～３-８號嚟呀！」

「如果全部都係女生，外籍女士話冇問題呀～」

「係呀～係呀～全部都係女生呀～到時我唔會喺香港架！不過我太太係同兩個女一齊嚟喎～到時唔知可唔可以叫佢同我個女一間房呢？」

吓……係咪玩嘢先！雖然外籍女士同你係同鄉啫，但一般人都唔會應承架喇！你慳錢唔租酒店都唔緊要，但做人唔好得寸進尺先得架嘛！

「咁樣，好似唔係太方便喎！」我一口幫佢推咗。

「係．係．真係唔方便，咁唔緊要喇～佢地三個迫一迫喇！我點搵你呢？」

「你打嚟香港公司可以搵到我架喇～我個直線係１２３４５６７」我先唔會比自己手提號碼你咁笨係嘛！

以為呢件事就咁搞掂喇，點知尋日又收到個長途電話。

「喂～唔該Ｓ小姐丫！」

「我係呀～你係．．．」平時搵開我嗰ｄ外籍人士，唔係咁既聲架喎！到底係乜水呢？

「我係ｘ先生個女呀！」

「哦～ｘ小姐，你好！」唔係嘛～又搵我咩事呀！

「我地而家訂機票呀～想問呢，如果我地夜晚11點幾先到香港，會唔會煩到你呢？你點比鎖匙我地呢？」唔係嘛～11點幾喎～你唔係要我接機，或者喺渡假屋等你地係嘛！！！

「ｘ太太上次去過渡假屋架，佢記唔記得點去呀？外籍女士嗰日會喺渡假屋等你地架！」其實想講句，你地唔使搵我架喇！

「哦．ｏｋ～Ｓ小姐你有冇英文名呢？」

「我叫 Simple～你呢？」

「我叫 Special～」

「哦～Special 咁你地定咗幾點到香港，再搵我喇～或者搵外籍女士都得架！」

「好丫～咁再聯絡喇！」

今日一早，我拿拿淋 send 咗ｄ地址呀、地圖呀咁比佢，仲比咗外籍女士個香港手機佢，希望佢地唔好再搵我喇～呢ｄ嘢都係你自己同外籍女士同聲同氣傾掂佢喇，唔關我事架！