猛鬼纏身

陳先生兩公婆都係中產人士，佢地有兩個聽教聽話ge寶貝女兒，一家生活樂也融融。响親朋戚友ge眼中，佢地呢家人簡直係模範家庭。

但係.....呢個模範家庭自大半年前開始變得愁雲慘霧，親朋戚友都刻意疏遠佢地一家人，原因係陳先生ge大女兒(「Joyce」)俾惡鬼纏身，搵極師傅幫手都搞唔掂，而且情況仲不斷惡化。親朋戚友為怕接觸陳氏一家會惹禍上身，所以都刻意疏遠呢家人。

Joyce ge惡鬼纏身經歷係咁ge...... 响大半年前ge一個晚上，Joyce瞓瞓吓覺突然覺得呼吸有d困難，於是佢就想坐起身，點知佢發覺自己全身都唔郁得，只有對眼可以打開望倒野。跟住，Joyce就望倒有一個唔係好高ge男人响佢隻手度「畫」咗幾下，然後果個男人就穿越玻璃窗(註﹕玻璃窗係關上ge)離開咗間房。到Joyce可以郁得番之後，佢就第一時走去搵陳先生兩公婆，然後將先前ge經歷講俾佢地聽。陳先生兩公婆初時仲安慰Joyce，話Joyce只係發噩夢，但當Joyce 俾隻手佢地睇ge時候，佢地都嚇到出唔倒聲，因為Joyce隻手有幾度血痕，好似係俾「界刀」界傷ge傷口。

陳先生以為有賊入屋，於是就即刻巡屋，但並無發現，屋內亦無被搜掠過ge痕跡。之後，陳先生就安排Joyce同妹妹同房瞓。

自從呢一日開始，Joyce經常俾隻男鬼傷害。唔係整到Joyce手腳瘀哂，就係响Joyce ge身上「界」花。陳先生兩公婆見倒Joyce 滿身傷痕都好心痛，佢地四出搵人求助，親朋戚友分別介紹咗無數咁多個師傅俾佢地，好多個師傅都話纏住Joyce果隻男靈體係「妖魔」而唔係「鬼」咁簡單，要整走呢隻男妖一d都唔容易。

師傅們各師各法打救Joyce，但每個師傅(包括信奉耶穌ge驅魔人)都只能帶來幾日安寧。眼見Joyce情況越來越嚴重，甚至連學都返唔倒，陳先生於是破釜沈舟，連屋都搬埋，希望可以避開隻男鬼。但新屋入伙唔夠幾日，隻男鬼已經追到嚟.....陳先生兩公婆不禁懷疑，唔通真係如師傅所講，隻男鬼一心要搵Joyce落去做老婆....

人去到絕望ge時候，就自自然然懂得自救，惡鬼......終於......都現身na..................

話說有一晚，陳先生成晚輾轉反側瞓得唔好，佢成晚都「形」住隻男鬼又會出現傷害Joyce。大約去到半夜ge時候，陳先生矇矇矓矓聽倒Joyce叫咗一聲，佢即時跳起身，走去隔離房(Joyce間房)。但陳先生都未行到Joyce房門口，度門已經「呯」一聲關埋(註﹕自從Joyce出事之後，佢地一家人都無關門瞓覺，以便Joyce大叫求救時可以第一時間增援)。陳先生二話不說一腳踢開度門，佢一眼就見倒果隻好矮細ge男鬼企咗响Joyce不遠處。陳先生當時火遮眼，連人鬼殊途都唔記得。佢居然捉賊咁捉隻鬼，原來隻男鬼係實體嚟架，真係可以捉得住架.....................

有時候搵師傅捉鬼係無用架，原來响危急關頭，有d人係可以變身「張天師」架.....當陳先生捉實隻男鬼之時，Joyce 已經開著咗房燈，陳太太原來已經蒲埋頭，隻男鬼原來係阿妹嚟架.......

成件事原來係咁ge，Joyce兩姐妹無意間知道dad & mom決定離婚，佢地唔想父母離婚，所以儍到做哂大龍鳳，話Joyce俾男鬼滋擾，希望可以藉此留住父母ge人&心，保持家庭「完整」。好好彩，陳先生兩公婆明白兩個乖女ge苦心，亦都俾佢地感動倒，決定嘗試再次接納對方。

原來唔係屋企有鬼，係心中有鬼至真

PG家長指引﹕各位大人細路，以上所講ge，係萬中無一ge案例，各位千祈唔好學呀，更加唔好試圖偷橋解決問題呀。