哭死–部手機壞咗？﹗

我要喊呀，部手機做咩事呀，唔通係壞咗？

部手機一直都打唔開，以為係無電啦，但係叉極佢都無反應喎，我咪攞埋另一嚿電出來換咗佢再叉過啦，點知都係無反應。

但係我好肯定無跌過﹑撞過﹑撼過部手機架，到底係咩事呀？

其實我星期四嗰晚將部手機叉咗通宵電，但係星期五返工太趕所以唔記得咗攞部手機，到咗放工返到屋企又無咗嗰回事喎，之後星期六朝早起身我見部手機無電咪攞去叉吓佢囉，但係都覺得奇怪架啦，明明星期四晚叉咗電架麻，而自從嗰次叉咗電之後我就無再用過部手機啦，所以又點會無電呢？但係我無理到，一於照叉可也﹗

之後我就無咗嚟回事，到咗星期日先記得返部手機係叉緊電既，但係我一睇唔知係邊個已經幫我熄咗叉住手機既電啦，我諗住開返部手機啦，點知都係話電池不足，好奇怪呢﹗但我心諗可能係唔知邊個喺我將部手機叉緊電既時候將電熄咗既啫，所以就開返電繼續叉喇。

到咗琴日朝頭早返工想開返部手機咯，點知部手機仍然係開極都開唔到，可是基於我要趕住出門口去返工既關係，所以我無理到佢，心諗可能都係無電啫。>"<|||

於是到咗放工返到屋企我再將部手機攞去叉叉佢，但心諗都係唔妥架啦，有咩可能會叉極都無電架，兩嚿電都係咁，無可能啩？

唔通係我叉電叉過頭？部機買唔夠一年架，就咁就報銷咗？我唔制吖，哭死﹗

我發誓我以後都唔會再買韓國機的了，我對上用過的嗰部手機叫Maxon，我俾佢細細部的外型吸引住，連咩牌子都唔知就買咗了，盛惠$1，699，買完返嚟個個都話我笨﹗

部手機買咗返嚟唔夠一日嚿電就壞咗啦，第二日仲要我特登攞返出去換，幾麻煩呀﹗跟住部手機用唔夠幾個月就成日壞，同而家用緊的手機一樣，成日叉完電都話無電，而打打吓電話又會無啦啦熄機喎，總之無好嘢發生﹗

但嗰時我無理到嚟部手機，反而攞返再上一部手機出嚟用，係Nokia8310，而家部機仲係屋企我家人用緊，所以話呢都係Nokia既手機好用同襟用得多唄。

↑Maxon手機，韓國貨喎，唉﹗↑

本來我一直用住部Nokia8310都相安無事既，點知我對上一份工d同事全部都係青年人，咁就出事啦，佢哋成日借d意笑我部手機out咗八百輩子了，唉，最後我就的起心肝買咗而家現用的這部手機了，係LG M6100。

↑LG M6100型號手機(網上圖片)，這型號有3隻色，全黑色﹑黑白色和上面那隻藍色，我買的就是藍色耶。↑

本來好多人都同我講過LG d機唔好用架啦，但係我又係衰咗係部手機的外型上面囉，我鍾意佢的的骰骰咁，好方便又好cutie吖麻，而且我諗LG話哂都係大牌子呀，無可能會好似Maxon咁易壞既，係咪先？點知就係咁又瀨多次嘢啦。

其實係我自己衰，明知屋企部LG錄影機一d都唔好用，之前用既嗰部Sharp好用好多呢，但係我都唔識死，仲夠膽去買部LG既手機，真係自己攞嚟衰﹗

唉，我以後都唔會再買韓國機架啦，再錯第四次既話我就真係蠢到無人有兼無得醫添架啦，吔吔。