開心。

在剛過去的星期五，我和lyly一起去荃灣的I.O.U. hair cutting，剪完後真係成個人都清爽哂呢﹗

本來我哋係諗住做直髮負離子的，但係因為lyly遲d要做姐妹，咁可能要set頭嗰d，如果整咗負離子好似好嘥咁，所以佢就唔整住了；而大家都話我d頭髮好直，整負離子係有錢無掟洗喎，哇哈哈。

就係咁樣，最後我哋兩個都剩係剪頭髮啫。

之後我哋就去搵豬豬介紹話好好味的「譚仔」諗住食米線啦，點知搵極都搵唔到，問人又無人知，我哋仲問咗一位警察叔叔添，佢第一個反應係︰「哦，好多人排隊嗰間吖麻﹗」，我哋兩個以為無死啦，點知佢竟然點咗我哋去第二間店度，真冤吖﹗

最後，我哋去咗藤一番度試吓，不過成頓晚餐我和lyly都食得唔係好開胃啫。你哋睇吓下面嗰碗麵就明架啦，係我叫的醬油拉麵，成碗麵油到吖，真係食幾啖已經覺得好滯﹑好肥膩了﹗

而且味道真只是算係麻麻啫，拉麵喎，根本唔係拉麵嚟架，d麵係全蛋麵嚟既，而且d麵多過d餸好多，真係食落都唔開胃，比起味千簡直係雲和泥之別呢﹗

而lyly叫咗嗰個係全蛋豬扒飯，佢食度嘔添吖，佢話碗飯雖然好大碗，睇落好似好抵食咁，但係d味道真係超差，佢話食度成口都係油唄﹗

雖然食咗頓不好的晚餐，不過都無損我哋跟住的shopping心情，後來lyly係「傘仔」度買咗一件衫，又係Ceu度買咗一件外套，而我就係Starrywood度買咗條4個骨的襯褲。

满載而歸，最開心的其實係lyly話睇完冰冰主演嗰套電影《寄生人》的簡介之後，佢覺得嗰story好懸疑，佢好有興趣入戲院度睇喎，係佢主動約我話等上咗畫之後一齊入戲院度睇嚟套戲架，哇哈哈，我聽到佢咁講都不知幾開心呢﹗於是我就順水推舟話不如19號放工之後去睇囉(上映的第一天)，佢都話無問題，我真係高興到飛起耶﹗

4月19日，還有5天咋，嘻嘻。