當蜈蚣遇上尿片與飯煲……

話說家住村屋的小弟某日在花園收番晒晾緊既牛仔褲番入黎著準備出門番工，突然左大腿有點刺痛……以為是褲入面有「刺」不以為然。幾秒後，到右大腿，仲要連續幾下向下伸延，才覺得該是有小昆蟲（如飛蟻）入了褲管。回到房內除低條褲又冇野飛出黎，再拎起條褲……

噢！！成條中指咁大既蜈蚣o係地下典來典去！！好核突 ~~ 成世仔第一次比蜈蚣咬 ~~

唉，間中睇報紙都會見到細細格新聞話有人比蜈蚣咬乜乜乜，今次到自己添。

第一樣要做既，當然既係報仇亦係實際需要，先要毀滅呢條可惡既蜈蚣。老婆o係我大叫期間已經入左房，見到蜈蚣既佢第一個反應係……原地跑（可能係 dup 地）？

望住原地跑既老婆，比蜈蚣咬左幾啖唔方便郁既我，提議老婆不如幫我拎 d 野黎打死條蜈蚣，如果唔係比佢走入床下底就弊……（唔知點解，條蜈蚣當時做既野同我老婆一樣：原地跑……果幾十隻腳係咁郁，但又走唔郁……）

兩分鐘內，老婆拎左兩樣好襯佢行為模式既野入房。老公強忍爆笑，「o黎」手就都係拎起床頭既鬧鐘「車」落條蜈蚣度，條蜈蚣當場 bit 左 d 汁出黎、反肚……

老婆的起阿 B（姐姐當日放假）、老公的起條放左入密實袋既蜈蚣，拿拿聲出門。行程都幾轉節，由有車牌但唔渣車的老婆坐助手位，由有車牌但對腳比蜈蚣咬到而腳痺既老公渣車，先去元朗擺低阿 B 比婆婆，再驅車往屯門醫院急症室。由於入元朗又停燈又塞車，到達屯門醫院時已是被咬的近一小時後。到醫院時，小弟雙腳已經麻痺、火燒咁痛，行都行唔到……

結果要由有車牌的老婆以輪椅推老公由停車場到急症室 ~~

醫生對於小弟自行渣車到醫院「下」左一聲，相信佢唔係稱讚緊我唔濫用救護車。

打針洗傷口後天都已黑齊八點幾，心血來潮叫左個外賣燒鵝脾飯要以形補形。回家後不知是藥力發作還是什麼，一睡竟就是 14 個小時……

*************************************************************************

不過話時話，對於豆丁咁細粒的小 bee，與及懷著 B 二號的老婆，屋企最咬得果個就係我，都算不幸中之大幸……

最後，比一條問題問下大家……如果您o係屋企見到一條蜈蚣，您會拎 d 乜野黎打死佢？（試選擇 2 樣）

A）漫長書
B）軟綿綿的尿片
C）拖鞋
D）報紙
E）……飯煲

不過無論如何，真謝謝老婆的悉心照料同關懷備至，我就是愛死這麼可愛的妳 ~~ ~~