台北自遊行之旅@第二天

24.03.2009

由於今日一早plan左要去d比較遠既地方, 所以我同Honey幾攰都好, 我地都唔敢訓

得太晏, 起身妝扮好後, 我地就去旅店附屬既coffice shop 食左個簡便早餐之後,

我地就乘搭捷運去今日第一個目的地 ~ 淡水, 天書話果邊有好多野食之外,

風景亦都好靚, 搭捷運半個鍾頭就到lu, 點知..... 可能我地真係太早去到嘞,

好多食野既地方都未開, 所以我地唯有扮晒浪漫咁行海旁,

話咁快就行完喇, 點好呢???

唯有先過去漁人碼頭喇, 天書介紹可以搭渡輪過去, 一睇之下, 唔係卦, 使唔使

咁貴呀, 一個人來回要NT100, 雖然對返港幣係好平, 不過搭得果一陣, 我地就

覺得唔太抵囉, 繼續行, 又比我地發現原來可以搭巴士去喎, 又可以平d,

又可以side下d時間, 等左一陣就有車嘞, 不過其實都幾遠架, 到左總站,

一落車, 一陣冷風吹埋黎, 可以始終都係o係海邊, 而且又落大雨,

一個小小既漁人瑪頭, 確實係冇咩好睇, 我同Honey撐住把細細既遮,

好"浪漫"咁行果條情人橋, 沿途一個人都冇,

想搵個人幫手影合照都唔得, 最後, 我只好"港女"上身 ~ 自拍

(P.S. 自問自己除左閒時玩下自拍外, 冇一樣係符合"港女"特質架)

行多一陣, 我地就搭返巴士返去lu, 沿途見到好多鋪頭都開左喇, Yeah !!

有街街行嘞, 不過因為我地掛住研究邊到落車近d, 導致我地miss左好幾個站,

最終係行遠左好多架, 唔緊要啦, 我地今次係relax之旅ma, 唔使咁趕既

唉, 但係我想食既舖頭都係未開門呀, 見有一間開左, 而且天書又有推介, 咁

梗係去試下喇, 食左依間鋪最出名既魚丸&"阿給"

味道怪怪咁, 都唔好食既....

冇野食, 就去買野先喇, 媽咪吩咐如果去淡水, 一定要去買"亞婆鐵蛋"比佢

一場黎到, 我又點會要佢失望呢??, 搵下搵下, 行下行下, 終於都搵到喇,

買完再行返過去, 開左喇開左喇, 我地食左鹽酥雞, 炸花枝, 炸榴槤,

仲飲左杏仁茶好飽好飽喇, 嘩..... 原來已經11點幾喇,

我地要出發去下一個景點lu, 下一個目的地係新北投,

果邊有個溫泉博物館, 之前我有同事去過, 佢都話值得

去睇下, 不過我都係覺得一般喇, 唔通我真係咁冇文化, 對於依d歷史悠久既野

冇興趣??

(唯一一張唔係自拍既合照)

好快咁行完個博物館, 原本根據我地既行程, 應該係上陽明山架,

不過由於我地唔太識路, 行左好耐都搵唔到個巴士站, 加上Honey又話想去

基隆睇下, 結果..... 陽明山 ~ 我地下次有緣再見啦

跟住我地搭返捷運去台北車站, 再轉搭火車去基隆,

不過台灣d火車好似香港d輕鐵咁, 一樣係咁複雜, 真係要睇清楚先好上車,

唔係隨時可能唔知去左邊

等左大約20分鍾, 終於都有車去基隆喇, 不過車程都好遠, 坐左好耐....

到喇到喇

Honey話先去左九份, 之後再落返黎行廟口夜市喎

咁我地就去左搵上九份既巴士站嘞, 不過真係好難好難搵,

最後都係要問人先至搵到, 又係等左好耐先有車,

不過上九份既車程真係超遠, 個司機仲要係開得好快咁行d山路,

搞到我都有d驚驚地, 到站可以落車嘞

我地去到已經係5點幾, 再加上

落雨, 個天好灰灰沈沈咁, 最重要既係好多鋪頭都已經落左閘, 我地只係試左

比較出名既魚丸

再周圍行多一陣就走lu, 搭返巴士去基隆, 我地就慢慢咁搵果個廟口夜市

車.... 又話有好多好野食, 都唔係既, 我諗成個夜市sales既係海鮮, 因為大部份既

攤檔都係賣海鮮架

不過, 我對海鮮興趣唔大, 加上Honey話驚唔乾淨, 所以我地最後都係混吉既

之後, 我地去左買鳳梨酥, 嘻嘻, 點解山長水遠要o係依度買?? 因為我地格過價,

依間係最抵買, 而且只此一間, 並冇分店架

搭火車返去台北喇, 嘩.... 果d火車時間指示牌真係好唔清晰架,

根本就唔知邊個月台係去台北o既,

唯有問下個職員喇, 佢用d我唔太明白既國語同我講 :

去台北既火車仲有兩分鍾就開, 如果miss左要等好耐,

咁我地咪跑呀跑呀咁落去月台囉, 真係有架車就黎開喇,

唔好理咁多喇, 上左去先算啦, 好彩我地上啱左, 不過, 依架可能

係d舊式火車, 居然冇顯示牌說明下一個係咩車站喎,

好彩去程我有留意下d車站名, 搭到咁上下, 我見到月台寫住松山站,

又突然記得天書話去饒河街夜市, o係松山站一出就係,

當然, 我地係即時落車啦, 真係好快就到

但係..... 我依然係覺得冇野好食o既, 可能係行得太耐好攰冇晒胃口卦,

只係Honey買左d著名既炸蟹返去食, 今日又係好攰喇, 我要返去訓喇

下回台北終極之旅, 待績.....